საჩხერის სამთო მომზადების ინსტრუქტორებმა შუალედური სამთო მომზადების ზაფხულის კურსის ფარგლებში სპეციალური სწავლებები ყაზბეგში განახორციელეს. სწავლებები ზღვის დონიდან 4100 მეტრამდე სიმაღლეზე ერთი კვირის მანძილზე გაგრძელდა.
წვრთნებში სამთო მომზადების სკოლის მომავალ ქართველ ინსტრუქტორებთან ერთად ჩეხი, სომეხი და უნგრელი სამხედრო მოსამსახურეებიც მონაწილეობენ. ისინი მაღალ მთაში მარშირებას, ნაპრალებზე გადაადგილებასა და თვითდაცვის ტექნიკას დაეუფლნენ. სამხედროებმა მაღალ მთაში და ყინულოვან რელიეფზე სამაშველო სამუშაოების შესრულების პრინციპები დახვეწეს.
„პარტნიორობა მშვიდობისათვის" (PFP) პროგრამის ფარგლებში დაგეგმილი ოთკვირიანი სწავლება სულ 4 ფაზისგან შედგება. ამ ეტაპზე კურსში მონაწილე სამხედროებმა მესამე ფაზა დაასრულეს. მეოთხე ფაზის განმავლობაში ისინი სპეციალურ ტესტებს ჩააბარებენ. სწავლების დასასრულს კი, წარმატებულ კურსდამთავრებულებს შესაბამისი სერთიფიკატები გადაეცემათ.
კურსის განმავლობაში საჩხერის სამთო მომზადების სკოლაში მივლინებულმა სამხედრო მოსამსახურეებმა სხვადასხვა ტიპის მომზადება გაიარეს, მათ შორის, მაღალ მთაში სროლის კურსი.
ოთხკვირიანი შუალედური სამთო მომზადების ზაფხულის კურსი 27 სექტემბერს საჩხერის სამთო მომზადების სკოლაში დასრულდება.
