,,ჩვენთან ერთად მსოფლიო კითხვის ნიშნის ქვეშ არც აყენებდა და არც დააყენებს ქვეყნის ოკუპაციას", _ განაცხადა ჟურნალისტებთან თავდაცვის მინისტრმა ირაკლი ალასანიამ რუსეთის საგარეო საქმეთა მინისტრის სერგეი ლავროვის განცხადების კომენტირებისას.
,,ამ შემთხვევაში საერთოდ არ მაინტერესებს რუსეთის აზრი, მე მაინტერესებს ის რომ საქართველოში სიმართლე გაირკვევა, მე მაინტერესებს ის, რომ მომავალში ჩვენს სამხედროებს შესაძლებლობა ექნება სწორად იხელმძღვანელონ, სწორად დაგეგმონ ჩვენი ქვეყნის თავდაცვა. Kკიდევ ერთხელ ვიტყვი, რომ ჩვენთან ერთად მსოფლიო კითხვის ნიშნის ქვეშ არც აყენებდა და არც დააყენებს ოკუპაციას, არ დააყენებს კითხვის ნიშნის ქვეშ, რომ ეს იყო სუვერენული ქვეყნის წინააღმდეგ აგრესიული ომი რუსეთის ფედერაციის მიერ საქართველოს წინააღმდეგ", -განაცხადა ალასანიამ.
შეგახსენებთ, რომ რუსეთის საგარეო საქმეთა მინისტრის სერგეი ლავროვის განცხადებით, რუსეთს არ ჰქონდა მიზნად დასახული 2008 წლის აგვისტოში სამხრეთ ოსეთის დამოუკიდებლობის აღიარება. ეს განცხადება
"მიზნად, დამოუკიდებელი სახელმწიფოს აღიარება დასახული არ ყოფილა. ამაზე არც არავინ ფიქრობდა. მე მოწმე ვიყავი იმ განხილვებისა, რომლებიც მოსკოვში მიმდინარეობდა. მიზანი იყო ერთი - შეჩერებულიყო სისხლისღვრა. მაგრამ, ამის შემდეგ თბილისდან რევანშისტული განცხადებები გაისმა, სააკაშვილმა უარი განაცხადა საფრანგეთისა და რუსეთის პრეზიდენტების წინადადებაზე - დაზავებაზე და აფხაზეთისა და სამხრეთ ოსეთის სტატუსთან დაკავშირებით საერთაშორისო განხილვების დაწყებაზე. ჩვენ მზად ვიყავით სტატუსის განხილვა საერთაშორისო კონტექსტში დაგვეწყო. საააშვილმა კი განაცხადა - არავითარი განხილვა", _ განაცხადა სერგეი ლავროვმა ტელეარხ "RTVi"-სთან საუბარში.
მისივე თქმით, საქართველოს პრეზიდენტის მიერ გაკეთებულმა რევანშისტულმა განცხადებებმა მიიყვანა რუსეთის ხელმძღვანელობა იმ დასკვნამდე, რომ დამოუკიდებლობის აღიარების გარდა უსაფრთხოებისა და ამ ხალხებს სიცოცხლის გადარჩენის სხვა გზა არ არსებობდა.
"მე ვერ ვხედავ, რომ ახლო მომავალში გამოჩნდეს ისეთი ქართველი პოლიტიკოსი, რომელიც იტყვის: მორჩა, ჩვენ დავივიწყეთ ეს, ჩვენ მართალი არ ვიყავით. ზუსტად ასევე არ იქნება რუსი პოლიტიკოსი, რომელიც იტყვის: მოდით, ყველაფერი თავის წრეზე დავაბრუნოთ. შეუძლებელია ეს მოხდეს. როდესაც ამერიკელები, ევროპაში ჩვეულებრივი შეიარაღების შესახებ შეთანხმების გაფორმების კონტექსტში გვთავაზობენ ჩვენ ჩავწეროთ იმ საზღვრების პატივისცემა, რომლებიც 2008 წლის აგვისტომდე არსებობდა, ჩვენ ვპასუხობთ, რომ მათ შეუძლიათ ჩვენ არ დაგვეთანხმონ, მაგრამ ეს რუსეთის პრეზიდენტის გადაწყვეტილებაა", _ აცხადებს სერგეი ლავროვი.
