ქართულმა ღვინომ აღიარება მოლდოვაში გამართულ გამოფენაზეც მიიღო. ღვინისა და სპირტიანი სასმელების საერთაშორისო გამოფენა -კონკურსზე - ,,CHISINAU WINES AND SPIRITS CONTEST" - ქართულმა კომპანიებმა 8 მედალი დაიმსახურეს.
როგორც დღეს სოფლის მეურნეობის მინისტრის მოადგილემ ია ჯანაშიამ განაცხადა, კიშინიოვში გამართულ კონკურსზე ქართულმა სასმელებმა 3 ოქროს და 5 ვერცხლის მედალი აიღეს. სოფლის მეურნეობის მინისტრის მოადგილემ, დღესვე გამარჯვებული კომპანიების წარმომადგენლებს სპეციალური დიპლომები გადასცა. ია ჯანაშიას განმარტებით, ოქროს მედალოსნები გახდნენ: „კორპორაცია ქართული ღვინო" და კომპანია „სარაჯიშვილი". აღსანიშნავია, რომ „სარაჯიშვილმა" „CHISINAU WINES AND SPIRITS CONTEST"-ზე ორი ოქროს მედალი მიიღო.
სოფლის მეურნეობის სამინისტროს ინფორმაციით, მოლდოვაში გამართულ კონკურსზე ოქროს მედები „კორპორაცია ქართული ღვინოს" ქინძმარაული მიკიტანი 2007-მა დაიმსახურა, ხოლო რაც შეესება „სარაჯიშვილის" პროდუქციას ოქროს მედალოსნები „ენისელი" და „XO" გახდნენ.
კონკურზე ვერცხლის მედლები დაიმსახურეს: ბაგრატიონი 1882 - კლასიკური მშრალი 2010; ბაგრატიონი 1882- ოქრო 2010; ბაგრატიონი 1882 - ნახევრად მშრალი 2010; შ.პ.ს. ვაინმენი - საფერავი კაბერნე 2010 და კახური ტრადიციული მეღვინეობა - ჭაჭა (ყურძნისეული);
აღსანიშნავია, რომ გამოფენა ,,CHISINAU WINES AND SPIRITS CONTEST" ვაზისა და ღვინის საერთაშორისო ორგანიზაციის (O.I.V.)-ის რეგლამენტით ჩატარდა.
როგორც სოფლის მეურნეობის სამინისტროში განმარტავენ, აღნიშნული ჯილდოები კიდევ ერთხელ უსვამს ხაზს ქართული ღვინისა და სპირტიანი სასმელების მაღალ ხარისხს, რაც საერთაშორისო ბაზრებზე პოპულარიზაციას და ქართული პროდუქციის ექსპორტის გაზრდას შეუწყობს ხელს.