,,ნატახტარის ლიმონათის" საქველმოქმედო პროექტის პირველი ნაწილი დასრულდა. „ნატახტარის" საქველმოქმედო ინიციატივას - „იზრუნე მომავალზე"-ს პირველ ეტაპს, პროექტის ხელმძღვანელები დადებითად აფასებენ, რადგანაც პროექტის ფარგლებში დაგროვილმა თანხამ, აქციის ორგანიზატორთა მოლოდინსაც კი გადააჭარბა.
როგორც კომპანია ,,ნატახტარისა" და ასოციაცია ,,ჩვენი სახლი-საქართველოს" ერთობლივ ბრიფინგზე გახდა ცნობილი, ,,იზრუნე მომავალზე" ,,ნატახტარის ლიმონათისათვის" ერთ-ერთი მნიშვნელოვანი პროექტია, რადგანაც აქცია მზრუნველობამოკლებულ მოზარდებს დამოუკიდებელი ცხოვრების პირველი ნაბიჯის გადადგმაში ეხმარება.
როგორც ცნობილია პროექტის - "იზრუნე მომავალზე" - პირველი ეტაპი - დასრულდა. ასევე დასრულებულია 16-იდან 18 წლამდე მზრუნველობამოკლებული ბავშვების ბაზის შედგენა. მომავალი კვირიდან, ბავშვებთან მუშაობას დაიწყებენ ფსიქოლოგები. მათი დასკვნის შემდეგ მოხდება ბავშვებისთვის საინტერესო და საჭირო პროგრამებისა და მიმართულებების დადგენა.
,,ნატახტარის" მარკეტინგის მენეჯერის თორნიკე ნიკოლაიშვილის განმარტებით, მოზარდების დახმარების პროცესი გამჭვირვალე იქნება და შეგროვებული თანხის მოცულობა 142 802 ლარი, შესაბამისი პროექტების მიხედვით გადანაწილდება და მთელი წლის განმავლობაში გაიხარჯება.
,,პროექტის დაწყებისას დავდეთ პირობა, რომ პროცესის ყველა დეტალი საზოგადოებისთვის იქნებოდა ღია და გამჭვირვალე. ამ ეტაპზე შესაძლებლობა გვაქვს, განვაახლოთ ინფორმაცია საქველმოქმედო ღონისძიებებთან დაკავშირებით, რომელსაც პროექტის ფარგლებში განვახორციელებთ. პირველი ეტაპი - თანხის შეგროვება, წარმატებით დასრულდა. ჩვენი გათვლით, 100 000 ლარამდე მოგება იყო ნავარაუდევი, მაგრამ შედეგმა მოლოდინს გადააჭარბა და მზრუნველობამოკლებული ბავშვების დასახმარებლად ბევრად მეტი თანხა შეგროვდა. ეს ნიშნავს, რომ მოხდა საზოგადოების კონსოლიდაცია ამ პრობლემის ირგვლივ, რაც მისასალმებელია. ჩვენი სურვილია, ვისაუბროთ იმ ღონისძიებებზე, რის განხორციელებასაც დაგროვილი თანხით ვაპირებთ. დასახული მიზანია, დავეხმაროთ ბავშვებს საზოგადოებასთან ინტეგრაციაში, რომ გარიყუალდ არ იგრძნონ თავი და საზოგადოების სრულფასობანი წევრები გახდნენ.
პირველ ეტაპზე გადავწყვიტეთ საქართველოს ბავშვთა სახლებში მყოფი ბავშვების აღწერა. შედგა კითხვარი, სადაც დაფიქსირდა ამ ბავშვების და მათი აღმზრდელების აზრი. ავირჩიეთ 16-17-18 წლის მოზარდების მიზნობრივი ჯგუფი. შეგროვილი თანხიდან 10 000 ლარი სხვა ბავშვებსაც მოხმარდება. ეს თანხა გაიხარჯება სხვადასხვა ღონისძიებებისთვის, რითაც მათი ერთფეროვანი ყოველდღიური ცხოვრების გახალისებას შევეცდებით", - განაცხადა ნიკოლაიშვილმა.
,,ნატახტარის" მარკეტინგის მენეჯერის თქმით, რამდენიმე თვის განმავლობაში ამ ბავშვებთან ფსიქოლოგი იმუშავებს, რომელიც მოზარდებს მათ წინაშე აღმართული ბარიერების დაძლევასა და საკუთარი თავის პოვნაში დაეხმარება. ნიკოლაიშვილის განმარტებით, სულ 58-ია, რომლებიც ახლოს არიან სრულწლოვან ასაკთან და ძალიან მალე დამოუკიდებლად მოუწევთ ცხოვრება. ამისთვის კი, მათ დახმარება სჭირდებათ და სწორედ ეს არის პროექტის ძირითადი მიზანი.
ასოციაცია ,,ჩვენი სახლი-საქართველოს" თანამშრომელი ლელა მერაბიშვილი კი განმარტავს, რომ სპეციალური კითხვარის საშუალებით, შესაძლებელი გახდა მოზარდების მისწრაფებების შესწავლა, რათა გამოვლენილიყო ის მიმართულებები, რითაც აქციის ორგანიზატორები მოზარდებს დაეხმარებიან.
შეგახსენებთ, რომ კომპანია "ნატახტარმა" 2011 წლის ნოემბერში, დააფუძნა ფონდი "ნატახტარი" და დაიწყო საქველმოქმედო პროექტის "იზრუნე მომავალზეს" განახორციელება. 3 თვის განმავლობაში "ნატახტარის ლიმონათის" თითოეული გაყიდული ბოთლიდან ფონდში ირიცხებოდა 1, 3 და 5 თეთრი (შეფუთვების შესაბამისად, 0.5ლ; 1ლ და 2ლ).
პროექტი ხორციელდება ასოციაცია "ჩვენი სახლი - საქართველოს" მხარდაჭერით და საქართველოს პატრიარქის თანადგომითა და ლოცვა-კურთხევით.