წლის დასაწყისიდან ქართული ღვინის ექსპორტი 8,5 %-ითაა გაზრდილი. როგორც დღეს სოფლის მეურნეობის მინისტრის მოადგილემ ია ჯანაშიამ განაცხადა, ქართული ღვინის ექსპორტი საკმაოდ წარმატებულად ხორციელდება და 2012 წლის გეგმა 21 მლნ ბოთლია, მაშინ როდესაც 2011 წელს 19 მლნ. ბოთლი ღვინის ექსპორტი განხორციელდა. მინისტრის მოადგილე აცხადებს, რომ სხვა წლებში წლის პირველ კვარტალში ღვინის ექსპორტი საკმაოდ პასიურად ხდებოდა, თუმცა წელს ზრდა 8,5 %-ია..
„ღვინის ექსპორტის კუთხით ძალიან საინტერესო წლის დასაწყისი გვაქვს, რადგანაც ხშირად წლის დასაწყისი არის საკმაოდ პასიური, თუმც წელს ექსპორტის 8,5 %-იანი ზრდა გვაქვს. საინტერესოა, რომ წელს მნიშვნელოვანი ზრდა გვაქვს სპირტიანი სასმელების ექსპორტის კუთხითაც და დღეისათვის არსებული მონაცემებით ზრდა 71 %-ია. ეს კი ნიშნავს იმას, რომ ქართული კომპანიები წარმატებულნი არიან, როგორც ღვინის ასევე სპირტიანი სასმელების ექსპორტის კუთხითაც.
წელს ქართული ღვინო 2 გამოფენაზე უკვე იყო წარდგენილი და ორივე გამოფენაზე საკმაოდ დიდი ჯილდოები და მოწონება დავიმსახურეთ. ხშირად პირველი კვარტალი საკმაოდ დიდი პასიურობით გამოირჩევა და წელს რეალურად საკმაოდ დიდი ზრდა გვაქვს. განსაკუთრებით ზრდა სახეზე პრიორიტეტულ ბაზრებზე, როგორიცაა ჩინეთი, პოლონეთი და ლატვია"- განაცხადა ია ჯანაშიამ.
ია ჯანაშია აცხადებს, რომ 15 მარტის მონაცემებით საქართველოდან უკვე ექსპორტირებულია 2 მლნ 788 ათას 197 ბოთლი ღვინო, მაშინ როდესაც 2011 წლის 15 მარტის მონაცემებით, ექსპორტზე 2 მლნ 569 ათას 942 ბოთლი ღვინო იყო გატანილი.
სოფლის მეურნეობის სამინისტროს ინფორმაციით, 2012 წლის 15 მარტის მონაცემებით, ღვინის ექსპორტი მნიშვნელოვნადაა გაზრდილი პრიორიტეტულ ბაზრებზე. საანგარიშო პერიოდში პოლონეთში ქართული ღვინის ექსპორტი 64 %-ითაა გაზრდილი, ლატვიაში - 41%-ით, ჩეხეთში - 138 %-ით, კანადაში - 81700%-ით, ესტონეთში - 87%-ით, აშშ-ში - 219%-ით, გერმანიაში - 199%-თ, თურქეთში - 183%-ით, იაპონიაში - 96%-ით, ინგლისში - 417%-ით, ხოლო ჩეხეთში - 14275%-ითაა გაზრდილი.
მინისტრის მოადგილის განმარტებით, სამინისტრო აქტიურად თანამშრომლობს ღვინის კომპანიებთან, რათა შემუშავებული იქნეს ერთიანი სამოქმედო გეგმა, რომ საექსპორტო ბაზრებზე ქართული ღვინის პრომოუშენი და ცნობადობა გაიზარდოს და კიდევ უფრო გააქტიურდეს.
„სამინისტრო ღვინის კომპანიებს საკმაოდ აქტიურად ხვდება და ერთობლივად უკვე დავსახეთ ის ბაზრები და მიმართულებები, სადაც კიდევ უფრო გავაქტიურდებით. 2011 წლის ბოლოს, როდესაც 2012 წლის გეგმები შევადგინეთ, ავღნიშნეთ, რომ აქტიურად მივიღებთ მონაწილეობას სხვადასხვა პრიორიტეტულ საერთაშორისო გამოფენებში, როგორიც იყო დუსლედორფისა და ლონდონის გამოფენები და მალე იქნება ჰონგ-კონგის გამოფენა. ჩვენ კომპანიებს დავეხმარებით სხვადასხვა ქვეყნებიდან ჟურნალისტების ჩამოყვანაში. აპრილში უკვე ჩამოდიან ლიტველი და ლატვიელი ჟურნალისტები, რათა მათი საშუალებით მოხდეს ქართული ღვინის პოპულარიზაცია და ცნობადობის გაზრდა. ღვინის კომპანიებს ჩვენ აქტიურად ვეხმარებით ასევე სხვადასხვა ღონისძიებების მოწყობაში, ანუ საუბარი მაქვს ბიზნეს კუთხით ორიენტირებული ღონისძიებების ჩატარებაზე, თითოეულ პრიორიტეტულ ქვეყანაში, სადაც მოწვეულნი იქნებიან ტრეიდერები და მათ გავაცნობთ ქართულ ღვინოს, მივაწვდით უფრო მეტ ინფორმაციას ქართული ღვინის წარმოებაზე: თუ რას ჯიშები გვაქვს და რა ტიპის ღვინოებს ვასაწრმოებთ"- აღნიშნა სოფლის მეურნეობის მინისტრის მოადგილემ.
