აშშ და ისრაელი ირანს ჯერ კიდევ მიმდინარე წლის ბოლომდე დაარტყამს. ინფორმაციას ამის შესახებ "კომერსანტი" რუსეთის საგარეო საქმეთა სამინისტროში არსებულ მაღალჩინოსან თანამშრომელზე დაყრდნობით ავრცელებს. ამავე დროს სხვა და სხვა სოციოლოგიური მონაცემებით, ამერიკელების უმრავლესობა ისლამურ რესპუბლიკაში შეჭრას ემხრობა.
აღსანიშნავია, რომ თეირანს ომის თავიდან ასარიდებლად ბოლო შანსი დარჩა და ეს აპრილში საერთაშორისო შუამავლების "ექვსეულთან" დაგეგმილი მოლაპარაკებებია.
"კომენრსანტის" ინფორმაციით, აშშ სახელმწიფო მდივანი ჰილარი კლინტონი რუსეთსი საგარეო საქმეთა მინისტრს სერგეი ლავროვს სთხოვდა აშშ-ს ხელისუფლების პოზიცია ირანის ხელისუფლებამდე მიეტანა.
მოლაპარაკებების თემა კვლავაც იგივე რჩება - თეირანის ბირთვული პროგრამა და ატომური ენერგიის საერთაშორისო სააგენტოს ექსპერტების შეშვება პარჩინში მდებარე ობიექტზე.
"ირანში შეჭრა ჯერ კიდევ წლის ბოლომდე მოხდება" - წერს გამოცემა რუსეთის საგარეო საქმეთა სამინისტროს მაღალჩინოსანზე დაყრდნობით. მისივე თქმით, ისრაელი ბარაკ ობამას აშანტაჟებს - თუ პრეზიდენტი ომს არ დაუჭერს მხარს იგი გავლენიანი ებრაული ლობის მხარდაჭერას დაემშვიდობება.
ამავე დროს, აშშ-ს მოქალაქეთა უმრავლესობა მხარს უჭერს ირანზე დარტყმის მიყენებას იმ შემთხვევაში თუ დადასტურდება, რომ იგი მართლაც ბირთვულ იარაღს ქმნის. სოციოლოგიური სამსახურის "იპსოსის" ინფორმაციით, ამგვარ პოზიციას იკავებს გამოკითხულ ამერიკელთა 56 %. ამასთან ერთად, ასევე ნახევარზე მეტი ემცრობა ირანთან ომის დაწყებას იმ შემთხვევაშიც კი თუკი ეს საწვავზე ფასების ზრდას გამოიწვევს. ამავე დროს გამოკითხული ამერიკელების 62 % მხარს უჭერს ისრაელის სამხედროების მიერ ირანის ბირთვულ ობიექტებზე იერიშის მიტანას.
მეორე სოციოლოგიური გამოკვლევა კი რომელიც "World Public Opinion" -მა ჩაატარა აჩვენებს, რომ გამოკითხულ ამერიკელთა 70 % მიიჩნევს, რომ ეკონომიკური ზეწოლა და სანქციები თეირანის წინააღმდეგ სავსებით საკმარისია. ამ გამოკითხვის მიხედვით, ნახევარზე მერი მიიჩნევს, რომ თუკი ისრაელმა ირანის წინაღმდეგ ბრძოლა დაიწყო აშშ-მ ნეიტრალიტეტი უნდა შეინარჩუნოს.
