დონალდ ტრამპი საქართველოში ჯერ ბათუმის პროექტს განახორციელებს, ხოლო ამის შემდგომ მოხდება თბილისის პროექტის რეალიზება, - ამის შესახებ "ჯი-ეიჩ-ენს" ეკონომიკისა და მდგრადი განვითარების მინისტრმა ვერა ქობალიამ განუცხადა.
მინისტრი ბათუმის პროექტით აღფრთოვანებულია და აცხადებს, რომ დონალდ ტრამპის ბათუმის პროექტი საკმაოდ ლამაზი იქნება.
"რაც ეხება საქართველოში დონალდ ტრამპის პროექტებს, ბათუმის პროექტის განხორციელება საკმაოდ სწრაფი რეჟიმით მიმდინარეობს. ჩვენ ურთიერთობა გვაქვს არქიტექტორებთან, რომლებიც ამ პროექტზე მუშაობენ. ისინი საქართველოში 2-ჯერ ან 3-ჯერ ჩამოდიან რათა არქიტექტურული ნაწილი დროულად დასრულდეს და პროექტი შემდგომ ეტაპზე გადავიდეს.მინდა გითხრათ რომ საკმაოდ ლამაზი პროექტი გამოდის. ბათუმის პროექტის მშენებლობის შემდგომ გაგრძელდება პროცესი და საუბარია თბილისის პროექტზე. პირველ ეტაპოზე განხორციელედბა ბათუმის პროექტი, ხოლო შემგომ თბილის პროექტი"- აცხადებს სააგენტო „ჯი-ეიჩ-ენთან" საუბრისას ეკონომიკისა და მდგრადი განვითარების მინისტრი.
როგორც ცნობილია, ცნობილი ამერიკელი მილიარდელი დონალდ ტრამპი საქართველოს 20 აპრილს ეწვევა. ვიზიტის ფარგლებში დონალდ ტრამპი საქართველოს პრეზიდენტს შეხვდება და ინვესტირების შესახებ გარკვეულ დეტალებს სწორედ მიხეილ სააკაშვილთან განიხილავს.
ინფორმაციას ამერიკელი მილიარდერის საქართველოში ვიზიტის შესახებ, თავად ტრამპის კუთვნილი ორგანიზაციის აღმასრულებელი დირექტორი მაიკლ კოენი ადასტურებს.
კოენის განმარტებით, დონალდ ტრამპის კომპანიამ უკვე დაასრულა არქიტექტორულ პროექტზე მუშაობა, რომელიც ბათუმში უნდა აშენდეს. მისივე თქმით, ტრამპი 20 აპრილს თბილისში ჩამოვა, რათა პროექტთან დაკავშირებით Silk Road Group-თან და პრეზიდენტთან მოლაპარაკებები გამართოს.
როგორც ცნობილია, ამერიკელი მილიარდერის ვიზიტი საქართველოში ჯერ კიდევ დეკემბერში უნდა შემდგარიყო, თუმცა ვიზიტი გადადიდო და მაშინ "სილქროუდ ჯგუფმა" განმარტება გააკეთა, რომ ვიზიტი სავარაუდოდ 2012 წლის დასაწყისში შედგებოდა.
ტრამპის ორგანიზაციასა და "სილქროუდ ჯგუფს" შორის თანამშრომლობის ხელშეკრულება აშშ-ში, გასულ წელს საქართველოს პრეზიდენტ მიხეილ სააკაშვილის ვიზიტის ფარგლებში, მარტში გაფორმდა. ქართულ მხარესა და დონალდ ტრამპს შორის ხელი მოეწერა ხელშეკრულებას, რომლის თანახმად Trump Tower საქართველოშიც აშენდება.
გეგმის მიხედვით, ტრამპის ინვესტირებით, თბილისსა და ბათუმში საცხოვრებელი კომპლექსი და სასტუმრო უნდა აშენდეს. მშენებლობაში პირველ ეტაპზე 250 მილიონი ამერიკული დოლარი ჩაიდება, თუმცა ორგანიზაციის ხელმძღვანელობა სამომავლოდ ინვესტიციის გაზრდას გეგმავს.
პროექტის დასრულების შემდეგ, სასტუმრო და საცხოვრებელი ბინების გარდა, შენობებში კომერციული ფართები და სამორინეები განთავსდება.
