ტენდერებში მონაწილეობისას „თეთრ სიაში" მოხვედრილი კომპანიები გარკვეული პრივილეგიებით ისარგებლენენ. „სახელმწიფო შესყიდვების შესახებ" კანონში შესატანი ცვლილებების მიხედვით, შესყიდვებში მონაწილე კვალიფიციურ მიმწოდებელთა რეესტრში - თეთრ სიაში აისახება სახელმწიფო შესყიდვებში მონაწილე იმ კვალიფიციურ მიმწოდებელთა მონაცემები, რომლებიც აკმაყოფილებენ თეთრ სიაში რეგისტრაციისათვის კანონქვემდებარე ნორმატიული აქტით დადგენილ კრიტერიუმებს. თეთრ სიაში რეგისტრირებული მიმწოდებელი სახელმწიფო შესყიდვებში მონაწილეობისას სარგებლობს კანონქვემდებარე ნორმატიული აქტით გათვალისწინებული გამარტივებული პროცედურებით.
კანონპროექტის განმარტებით, ბარათში ნათქვამია, რომ აღნიშნული ცვლილებით ხდება სახელმწიფო შესყიდვების განხორციელებისას, წინასწარი ანგარიშსწორების შემთხვევაში, შემსყიდველი ორგანიზაციებისათვის წინასწარ გადასახდელ თანხებზე გარანტიის წარდგენის და გარანტიის წარდგენისაგან გათავისუფლების ახალი და ალტერნატიული მეთოდების განსაზღვრა, რაც ხელს შეუწყობს მეტი ინტერესის გაჩენას მიმწოდებლების მხრიდან, მიიღონ მონაწილეობა სახელმწიფო შესყიდვების პროცედურებში. კანონპროექტი 2012 წლის 1 მაისს ამოქმედება უკავშირდებ, რაც შესაბამისი მოსამზადებელი ტექნიკური სამუშაოების ჩატარების აუცილებლობითაა გამოწვეული.
კანონპროექტის შემუშავების მიზეზია სახელმწიფო შესყიდვების მარეგულირებელ კანონმდებლობაში არსებული საკანონმდებლო რეგულაციების გამარტივების აუცილებლობა სახელმწიფო შესყიდვის შესახებ ხელშეკრულებების შესრულების მიმწოდებლებისათვის გამარტივებისა და ფინანსურად უფრო მიმზიდველად გადაქცევის კუთხით.
კანონპროექტი მიზნად ისახავს სახელმწიფო შესყიდვების განხორციელებისას, წინასწარი ანგარიშსწორების შემთხვევაში, შემსყიდველი ორგანიზაციის მიერ წინასწარ გადასახდელ თანხებზე ყოველ კონკრეტულ შემთხვევაში სპეციალური გარანტიის წარდგენისგან გათავისუფლების შესაძლებლობას და გარანტირების ახალი მექანიზმების დანერგვას, რაც მიზნად ისახავს სახელმწიფო შესყიდვების სისტემის ეფექტურობის გაზრდასა და მიმწოდებლებისათვის უფრო ხელსაყრელი პირობების შექმნას.
