2011 წლის მეოთხე კვარტალის მონაცემებით, უცხოურ ინვესტიციებში ყველაზე დიდი წილი ენერგეტიკის სექტორს უკავია. სტატისტიკის ეროვნული სამსახურის წინასწარი ინფორმაციით, გასული წლის მეოთხე კვარტლის განმავლობაში, საქართველოში სულ 337,5 მლნ აშშ დოლარის უცხოური ინვესტიცია შემოვიდა.
აქედან, ენერგეტიკაში 79,1 მლნ აშშ დოლარი ჩაიდო, რაც 2010 წლის ანალოგიური პერიოდის მაჩვენებელს 12-ჯერ აღემატება.
გარდა ამისა, სტატისტიკის ეროვნული სამსახურის ცნობით, 2011 წელს ენერგეტიკაში უცხოური ინვესტიციის სახით სულ 158, 1 მლნ აშშ დოლარი ჩაიდო.
ენერგეტიკისა და ბუნებრივი რესურსების მინისტრის მოადგილის გიორგი ყაველაშვილის შეფასებით, ენერგეტიკის მიმართ ინვესტორების დაინტერესება მუდმივად იზრდება, რაც სტატისტიკის სამსახურის მიერ გამოქვეყნებულ მონაცემებშიც აისახა.
მისი განცხადებით, მომავალში ენერგეტიკაში უცხოური ინვესტიციები უფრო გაიზრდება, რადგან სამინისტრომ რამდენიმე მსხვილი პროექტის განხორციელება დაგეგმა, რაც ამ სექტორში დამატებით ინვესტიციებს მოიზიდავს და ახალ სამუშაო ადგილებს შექმნის.
