პარიზში გამართულ საკონდიტრო ხელოვნების მსოფლიო ჩემპიონატში "გუდვილის" კონდიტერები საუკეთესოთა ათეულში მოხვდნენ. კონდიტერთა მესამე მსოფლიო ჩემპიონატზე საქართველო პირველად იყო წარმოდგენილი. საკონდიტრო ნაწარმის ოთხდღიანი მარათონი გუდვილის კონდიტერების ორმაგი წარმატებით დასრულდა. საუკეთესო ათეულში მოხვედრის გარდა, კონდიტერებმა მედიის სიმპატიის ჯილდოც დაიმსახურეს.
DGF -ს მიერ ორგანიზებული "Mondial des Arts Sucres" (მსოფლიო ტკბილეულის ხელოვნების) ჩემპიონატი 3-6 მარტს გაიმართა.
ჩემპიონატს 3 ძირითადი მოთხოვნა ჰქონდა:
1: კონდიტერებს უნდა შეექმნათ სკულპტურები, რომელიც შოკოლადით, კარამელით და შაქრის ფხვნილისგან მიღებული პასტიაჟით იყო შესრულებული. ამ შემთხვევაში დიდი მნიშვნელობა შესრულების ხარისხთან ერთად შინაარსობრივ დატვირთვასაც ენიჭებოდა. სკულპტურები უნდა ყოფილიყო კრეატიული და მაღალტექნოლოგიური დონით შესრულებული.
2: კონდიტერებს ევალებოდათ ტრუფელების და პწიფურების ( მინი ნამცხვრები, რომლის წონა 30გრ-ია) შექმნა.
3: კონდიტერები შეფასდნენ დესერტებისა და ნამცხვრების მომზადებაში.
„მსოფლიო ჩემპიონატში გუდვილის კონდიტერთა მონაწილეობა ძალიან საპასუხისმგებლო მისია იყო. ჩვენმა კონდიტერებმა შეძლეს და დაამტკიცეს, რომ საკონდიტრო ხელოვნება საქართველოშიც საკმაოდ მაღალ დონეზეა განვითარებული. 135 მონაწილე ქვეყნიდან გუდვილის კონდიტერები საუკეთესო ათეულში მოხვდნენ. ეს არის თავდაუზოგავი შრომის , და პროფესიონალიზმის შედეგი, რომელსაც კონდიტერების მრავალწლიანი სწავლება უდევს საფუძვლად",-განაცხადა "გუდვილის" გენერალურმა დირექტორმა მიხეილ ჩარკვიანმა.