ყაზახი-საგურამოს 1000მმ-იანი მაგისტრალური გაზსადენის 114-ე კმ-ზე, მამკოდის დასახლებასთან ავარია დაფიქსირდა. ადგილზე არსებული მეწყერის გააქტიურებამ მილსადენის დაზიანება გამოიწვია, რის გამოც სომხეთში გაზის ტრანზიტი დროებით შეწყდა.
დაზიანებული მონაკვეთი დღეს საქართველოს ენერგეტიკისა და ბუნებრივი რესურსების მინისტრმა ალექსანდრე ხეთაგურმა და საქართველოს ნავთობისა და გაზის კორპორაციის გენერალურმა დირექტორმა ზურაბ ჯანჯღავამ მოინახულეს.
ალექსანდრე ხეთაგურის განცხადებით, გუშინ საღამოს დაახლოებით 20:00 საათზე დაფიქსირდა ავარია მაგისტრალურ გაზსადენზე, რომელიც საქართველოს სომხეთთან აკავშირებს. როგორც მინისტრმა აღნიშნა, მიმდინარეობს მუშაობა და, სავარაუდოდ, სამშაბათს სომხეთის გაზმომარაგება აღდგება.
როგორც ზურაბ ჯანჯღავამ განაცხადა, ავარია მეწყერის გააქტიურებამ გამოიწვია და მის აღმოსაფხვრელად გაზსადენის ოპერატორი - "საქართველოს გაზის ტრანსპორტირების კომპანიის" საავარიო ბრიგადები 24-საათიან რეჟიმში მუშაობენ; მონაკვეთი რამდენიმე დღეში აღდგება. "საქართველოს მოსახლეობის გაზმომარაგებას პრობლემა არ ექმნება, რადგანაც ეს მილსადენი სომხეთის მომარაგებაზეა მიმართული", - აღნიშნა ჯანჯღავამ.
ავარიის შესახებ სომხური მხარე ინფორმირებულია.