ჰიდროელექტროსადგურს "გუბაზეულიჰესი 6" თურქული კომპანია EMCT PAZARLAMA INSAAT TAAHHUT TICARET LTD.STI-ი ააშენებს.
ჰესის მშენებლობაზე მემორანდუმი საქართველოს მთავრობას, "ელექტროენერგეტიკული სისტემის კომერციულ ოპერატორსა" და ინვესტორს შორის 25 აგვისტოს გაფორმდა. მემორანდუმს ხელი საქართველოს მთავრობის მხრიდან ენერგეტიკისა და ბუნებრივი რესურსების მინისტრმა ალექსანდრე ხეთაგურმა და EMCT PAZARLAMA INSAAT TAAHHUT TICARET LTD.STI-ის წარმომადგენელმა ექბერ თოფალმა (Ekber Topal) მოაწერეს.
3 მგვტ-ი დადგმული სიმძლავრის „გუბაზეულიჰესი 6" გურიის რეგიონში, მდინარე გუბაზეულზე აშენდება. ჰესის საინვესტიციო ღირებულება 4,5 მლნ აშშ დოლარია, ხოლო წლიური გამომუშავება 20 მლნ კვტ.საათს შეადგენს. ჰესის მშენებლობა მიმდინარე წლის დეკემბერში დაიწყება და 2013 წლის დეკემბერში დასრულდება.
"გუბაზეულიჰესი 6" ექსპლუატაციაში 2014 წლის იანვარში გაეშვება
