არასამთავრობო ორგანიზაცია "ეკონომიკური პოლიტიკის ინსტიტუტი" "ჯეოსელის" წინააღმდეგ კამპანიას გეგმავს. როგორც აღნიშნული ორგანიზაცია იუწყება, ცალკეული კომპანიები (მათ შორის კომპანია "ჯეოსელი"), ხშირად უგულებელყოფენ მომხმარებელთა ინტერესებს (მიმდინარე წლის ბოლო რამოდენიმე თვის განმავლობაში ამის არაერთი ფაქტი დაფიქსირდა).
"მაგალითად, ყველაზე გავრცელებული შემთხვევაა, როდესაც მომხმარებელი იძენს კომპანია ჯეოსელის მხრიდან შემოთავაზებულ სტანდარტულ ინტერნეტ პაკეტს, თავის მხრივ, კომპანია ჯეოსელი პაკეტის ამოწურვის შესახებ მომხმარებელს ინფორმაციას არ აწვდის და ინტერნეტის შემდგომი მოხმარებისათვის მომხმარებელს სტანდარტულ პაკეტზე რამოდენიმე ათეულჯერ მაღალი ტარიფით ბეგრავს. ეს იმ დროს, როდესაც თითოეული აბონენტი კომპანია ჯეოსელის მხრიდან, უმრავლეს შემთხვევაში სხვადასხვა სერვისის შესახებ დღის განმავლობაში უამრავ შეტყობინებას იღებს", - აცნობეს "ჯი-ეიჩ-ენს" "ეკონომიკური პოლიტიკის ინსტიტუტიდან".
არასამთავრობო ორგანიზაცია "ეკონომიკური პოლიტიკის ინსტიტუტი" მოუწოდებს ჯეოსელს, უარი თქვას მომხმარებელთა ინტერესების უგულებელყოფაზე და შეცვალოს არსებული პოლიტიკა.
"აღნიშნული მოთხოვნის დაუკმაყოფილებლობის შემთხვევაში "ეკონომიკური პოლიტიკის ინსტიტუტი" გეგმავს წამოიწყოს ფართომასშტაბიანი კამპანია, მათ შორის მიმართოს კომუნიკაციების მარეგულირებელ ეროვნულ კომისიას, რათა მსგავსი ფაქტების გამო სისტემატურად არ ზარალდებოდნენ ჯეოსელის კეთილსინდისიერი მომხმარებლები", - აღნიშნულია მათ მიერ გავრცელებულ განცხადებაში.
