23 აგვისტოს, ბათუმში ოლიმპიური სტანდარტების ყინულის მოედანი გაიხსნება. ბათუმის მერიის ინფორმაციით, მოციგურავეები მაყურებლის წინაშე 45-წუთიანი განახლებული რეპერტუარით წარსდგებიან.
როგორც ცნობილია, ყინულის სასახლის გახსნას ცნობილი მოციგურავე ელენე გედევანიშვილიც დაესწრება და რამდენიმე ნომერს შეასრულებს.
მერიაში განმარტავენ, რომ სექტემბრიდან ყინულის სასახლეში მოსწავლეთა მიღება განახლდება. 4-დან 11 წლამდე ასაკის ბავშვები სასწავლო კურსს უფასოდ გაივლიან.
ახალი მოედანი საშუალებას იძლევა ეტაპობრივად 2200 ბავშვის მომზადება მოხდეს. პარალელურად, ყინულის სახლის მიმდებარე ტერიტორიის მოწესრიგება და გამწვანება მიმდინარეობს.
ყინულის სასახლის მშენებლობა ახალ ბულვარში მაისში დაიწყო. სამშენებლო სამუშაოებს კომპანია "ბრაით ლაითი" აწარმოებდა. მშენებლობისთვის 2,5 მილიონი დაიხარჯა.
