საქართველოს კომუნიკაციების ეროვნულ კომისიას შპს "სუპერ ტვ"-მ საჩივრით მომართა. კომპანიის განცხადებაში ნათქვამი იყო, რომ "სუპერ ტვ" თავისი აბონენტებისთვის მომსახურების მისაწოდებლად იყენებს სატელეკომუნიკაციო საკანალიზაციო არხში განთავსებულ კაბელებს. ეს კაბელები კი კომპანია "სილქნეტის" კუთვნილ საკანალიზაციო სისტემაშია განთავსებული. მხარეებს ამ მომსახურებაზე ხელშეკრულება 2011 წლის 30 აპრილამდე ჰქონდათ გაფორმებული.

"სუპერ ტვ"-ის განცხადებით, 30 აპრილის შემდეგ კომპანია "სილქნეტმა" უარი განაცხადა ახალი ხელშეკრულების დადებაზე, რის საფუძველეზეც კომპანია "სუპერ ტვ"-მ განცხადება კომისიაში შეიტანა.

მართალია, საქართველოს კომუნიკაციების ეროვნულმა კომისიამ "სუპერ ტვ"-ის საჩივარი წარმოებაში მიიღო, მაგრამ ამავე დროს ორივე მხარეს დავის მორიგებით დასრულება შესთავაზა. რამდენიმე კვირიანი მოლაპარაკებების შემდეგ კომპანიები შეთანხმდნენ. დღეს გამართულ სხდომაზე დავის განხილვის თაობაზე ადმინისტრაციული წარმოება შეწყდა, დავის საგანის არარსებობის გამო.