საქართველოს ფინანსთა სამინისტროსა და გერმანიის სახელმწიფო ბანკ "KFW"-ს შორის დღეს შეთანხმებ გაფორმდა ა, რომლის საფუძველზეც ბათუმს წყალ-კანალიზაციის სისტემების რეაბილიტაციისთვის მორიგი ტრანში გამოეყო. 39 მლნ ევროდან 20 მლნ შეღავათიანი კრედიტია, ხოლო - 19 მლნ გრანტი. ამავე მიზნებისთვის ბათუმის თვითმმართველობა დამატებით 5 მილიონ ევროს დახარჯავს.
ფინანსთა სამინისტროს ინფორმაციით, ამ ფინანსური რესურსის ფარგლებში დაგეგმილია ბათუმში წყალმომარაგების სისტემების რეაბილიტაციის დასრულება და წყალარინების სისტემის რეაბილიტაცია ქალაქის ტერიტორიის უმეტეს ნაწილში. ამის შედეგად, შესაძლებელი გახდება სასმელი წყლის 24 საათიანი მიწოდება ქალაქის მასშტაბით. ბათუმის მიმდებარე სამ სოფელში (ჩაქვი, მწვანე კონცხი და მახინჯაური) განხორციელდება არსებული წყალმომარაგების ინფრასტრუქტურის მოდერნიზაცია და აღნიშნული სოფლების უზრუნველყოფა დეცენტრალიზებული წყალარინების სისტემებით.
პროექტის ფარგლებში აგრეთვე მიმდინარეობს კანალიზაციის გამწმენდი ნაგებობის მშენებლობა ადლიაში, რომლის დასრულების შემდეგ ზღვის აკვატორია ბათუმსა და მის შემოგარენში დაცული იქნება ქალაქის ჩამდინარე წყლებით დაბინძურებისაგან.
აჭარის მთავრობაში განმარტავენ, რომ "KFW"-ს მორიგი ტრანში 2012-2015 წლებში ბათუმის უბნების: თამარის დასახლების, ბონი-გოროდოკისა და აეროპორტის მიმდებარე ტერიტორიების წყლისა და კანალიზაციის სისტემების რეაბილიტაციას მოხმარდება.
„KFW"-ს დახმარებით უმნიშვნელოვანეს პროგრამას ვახორციელებთ. ქალაქის განვითარებისთვის უკეთესი ინფრასტრუქტურა გვჭირდება. მადლობას ვუხდით გერმანიის მთავრობას, რომ გვეხმარებიან", - განაცხადა აჭარის მთავრობის თავმჯდომარემ ლევან ვარშალომიძემ სტუმრებთან შეხვედრის შემდეგ.
"KFW"-ს პროგრამა 2008 წლიდან ხორციელდება. მას შემდეგ "KFW"-მ 52 მლნ ევრო გამოყო. ქალაქის უმეტეს ნაწილში თითქმის მთლიანად შეიცვალა წყლისა და კანალიზაციის მილები, გაკეთდა რეზერვუარები, სათავე და საფილტრი ნაგებობები. პარალელურად, ბათუმის მერია ახორციელებს ქუჩების სანიაღვრე არხებით დაქსელვასაც.
2015 წლიდან დაიწყება "KFW"-ს პროგრამის მე-4 ფაზა, რომლითაც ბათუმის მიწისქვეშა კომუნიკაციების რეაბილიტაცია დასრულდება. ამისთვის ბათუმი კიდევ 35-40 მილიონ ევროს მიიღებს. აღსანიშნავია, რომ პროგრამის ფარგლებში წყლისა და კანალიზაციის სისტემების რეაბილიტაცია იგეგმება ქალაქის ახლადშემოერთებულ ტერიტორიებზეც.