ღვინის ქარხნები წელს რქაწითელის ჯიშის ყურძენს 25 თეთრად ჩაიბარებენ, რომელსაც სახელმწიფო სუბსიდიიდან 15 თეთრი დაემატება. როგორც ღვინის ქარხნების დირექტორებმა კახეთის საინფორმაციო ცენტრთან აღნიშნეს, საფერავის ჯიშის ყურძნის ფასი 60 თეთრი იქნება. აქედან 35 თეთრს ღვინის ქარხანა გადაიხდის, 25 თეთრს სახელმწიფო. რთველი 25 აგვისტოს დაიწყება და 7 - 8 კვირის განმავლობაში გაგრძელდება.
სოფლის მეურნეობის მინისტრის ბაკურ კვეზერელის თქმით, ყურძენს 27 კომპანია 32 ღვინის ქარხანაში ჩაიბარებს. წინასწარი მონაცემებით, წელს რეგიონში სულ 120 ათას ტონამდე ყურძნის მოსავალია მოსალოდნელი. აქედან 82 ათასი ტონა რქაწითელია, 27 ათას ტონამდე საფერავი.
შეგახსენებთ, გასულ წელს, რამდენიმე დღის განმავლობაში, რქაწითელის ჯიშის ყურძნის ჩასაბარებელი ფასი 45 - დან 80 თეთრამდეც გაიზარდა.