დღეს, 18 აგვისტოს, ბათუმში საქართველოს მთავრობასა და გერმანიის განვითარებისა და რეკონსტრუქციის ბანკს (KFW) შორის მორიგი ხელშეკრულება გაფორმდება. ხელშეკრულების მიხედვით, ბათუმი საკომუნიკაციო ინფრასტრუქტურის მოწერიგებისთვის 39 მლნ. ევროს მიიღებს.
ფინანსთა სამინისტროს ინფორმაციით, 18 აგვისტოს, 10:45 საათზე, ბათუმის იუსტიციის სახლში, KFW-სა და საქართველოს მთავრობას შორის სამი საგრანტო და ერთ სასესხო ხელშეკრულება გაფორმდება, რომლის მიხედვითაც საქართველოს მთავრობა ბათუმში მიმდინარე წყლისა და კანალიზაციის სისტემის სარეაბილიტაციო სამუშაოს, მესამე ფაზის დასაწყებად 39 მლნ. ევროს მიიღებს. ხელშეკრილებას ხელს საქართველოს ფინანსთა მინისტრი დიმიტრი გვინდაძე და გერმანიის განვითარებისა და რეკონსტრუქციის ბანკის წარმომადგენელი მოაწერენ.
"KFW"-ის მიერ გამოყოფილი თანხა 2012-იდან 2015 წლების ჩათვლით მოხმარდება ბათუმის უბნების: თამარის დასახლების, ბონი-გოროდოკისა და აეროპორტის მიმდებარე ტერიტორიების წყლისა და კანალიზაციის სისტემების რეაბილიტაციას.
აჭარის მთავრობის ინფორმაციით, "KFW"-ს პროგრამა 2008 წლიდან ხორციელდება. პირველ ორ ეტაპზე "KFW"-მ ჯერ 17, შემდეგ კი - 35 მილიონი ევრო გამოყო. ამ ხნის განმავლობაში ქალაქის უმეტეს ნაწილში თითქმის მთლიანად შეიცვალა წყლისა და კანალიზაციის მილები, გაკეთდა რეზერვუარები, სათავე და საფილტრი ნაგებობები. პარალელურად, ბათუმის მერია ახორციელებს ქუჩების სანიაღვრე არხებით დაქსელვას.
საქმე ისაა, რომ ქალაქის მიწისქვეშა კომუნიკაციები გასული საუკუნის 40-იან წლებში გაკეთდადა და იგი გათვლილი იყო დაახლოებით 50-ათასიან ქალაქზე. მას შემდეგ, სისტემების კაპიტალური შეკეთება და გაფართოება არ მომხდარა. ეს მნიშვნელოვან პრობლემებს უქმნიდა ბათუმის მოსახლეობას და ხელს უშლიდა ქალაქის განვითარებას.
2015 წლიდან დაიწყება "KFW"-ის პროგრამის მე-4 ფაზა, რომლითაც ბათუმის მიწისქვეშა კომუნიკაციების რეაბილიტაცია დასრულდება. ამისთვის ბათუმი კიდევ 35-40 მილიონ ევროს მიიღებს. აღსანიშნავია, რომ პროგრამის ფარგლებში წყლისა და კანალიზაციის სისტემების რეაბილიტაცია იგეგმება ქალაქის ახლად შეერთებულ ტერიტორიებზედაც.
პროექტის მიხედვით, მიწისქვეშა კომუნიკაციის მოსაწესრიგებლად სულ 100 მლნ ევროზე მეტი დაიხარჯება.