ქართული მხარე თურქული გამოცემა haberler.com-ის მერ გამოქვეყნებულ ინფორმაციას, თითქოს თურქეთში ქართული ცხვარი დაავადების შედეგად დაეცა, კატეგორიულად უარყოფს.
საქართველოს მეცხვარეთა ასოციაციის თავმჯდომარე ბექა გონაშვილი აცხადებს, რომ საქართველოდან თურქეთში ცხვრის ექსპორტი არ განუხორციელებია.
გონაშვილის განმარტებით, შესაბამისი უწყებების მიერ ცხვრის თურქეთში ექსპორტირებაზე შესაბამისი საბუთი გაცემული არ არის.
მეცხვარეთა ასოციაციის თავმჯდომარე არ გამორიცხავს, რომ საქართველოდან თურქეთის მიმართულებით ცხვრის გადაყვანა არალეგალური გზით ხდებოდეს, რაც ქართული კანონმდებლობით დასჯადია. მისივე განმარტებით, ქართულ ცხვარს არანაირი დაავადება არ აქვს.
"ცხვარს თუ რაიმე ინფექციური დაავადება დაუფიქსირდა, ამ დაავადებების შემოტანა სომხეთიდან და თურქეთიდან ხდება და არა საქართველოდან თურქეთის მიმართულებით", - განმარტავს „ჯი-ეიჩ-ენთან" საუბარში მეცხვარეთა ასოციაციის თავმჯდომარე ბექა გონაშვილი.
შეგახსენებთ, რომ თურქულმა haberler.com-მა გაავრცელა ინფორმაცია თითქოს თურქეთში საქართველოდან შეყვანილი 300 ცხვარი დაიღუპა.
ვებ-გვერდის ინფორმაციით, ვეტერინარებმა დაღუპული საქონლის გამოკვლევისას საქონლის ჭირი აღმოაჩინეს.
გამოცემა წერს, რომ ქვეყნის აღმოსავლეთში მდებარე მუჯურის რაიონის ფერმერი რამადან კუმარი, რომელმაც 1100 სული ქართული ცხვარი შეიძინა აცხადებს, რომ საქონლის დაცემა პირველივე დღიდან დაიწყო.
"არ ვიცი რა მოვიმოქმედო. შემოყვანიდან 20 დღეში ფარაში სიკვდილიანობამ პიკს მიაღწია. ბევრი დაიღუპა, მაგრამ დაავადებულები კიდევ ბლომადაა. საქმის კურსში ჩავაყენე ვეტერინარული სამსახურები და ვცდილობთ გარკვეული ღონისძიებების გატარებას," - ამბობს ის.