ენერგეტიკული პარტნიორობის პროგრამის ფარგლებში, ბათუმში ენერგეტიკისა და წყალმომარაგების მარეგულირებელი ეროვნული კომისიისა და აშშ-ის კენტუკის შტატის მარეგულირებელი კომისიის წარმომადგენლების მონაწილეობით რიგით მე-4 სამუშაო შეხვედრა იმართება.
სამუშაო შეხვედრა სასტუმროში „ინტურისტ პალასი" დღეს გაიხსნა და 19 აგვისტოს ჩათვლით გაგრძელდება. შეხვედრა ბათუმის მერთან და აშშ-ის საერთაშორისო განვითარების სააგენტოს (USAID) წარმომადგენლებთან ერთად, ენერგეტიკისა და წყალმომარაგების მარეგულირებელი ეროვნული კომისიის თავმჯდომარემ გურამ ჩალაგაშვილმა გახსნა.
კენტუკის შტატის მარეგულირებელი კომისიისა და აშშ-ის კომუნალური მომსახურების მარეგულირებელი ეროვნული ასოციაციის (NARUC) 6-კაციან დელეგაციას შტატის მარეგულირებელი კომისიის აღმასრულებელი დირექტორი ჯეფ დეროუნი ხელმძღვანელობს.
შეხვედრებზე ყურადღება გამახვილდება ისეთ მნიშვნელოვან საკითხებზე, როგორიცაა ელექტროენერგიის განაწილების რეგულირება, მომხმარებელთა უფლებების დაცვა, წყლის სისტემის სტანდარტები და განვითარება, ტარიფების რეგულირება, საზოგადოებრივი ურთიერთობების გაუმჯობესება და სხვა.
პარტნიორობის პროგრამა, რომელიც USAID-ისა და აშშ-ის კომუნალური მომსახურების მარეგულირებელი ეროვნული ასოციაციის (NARUC) მხარდაჭერით უკვე რამდენიმე წელია ხორციელდება, გამოცდილების გაზიარებას ისახავს მიზნად. სემეკსა და NARUC-ს შორის პარტნიორობას საფუძველი 1999 წელს ჩაეყარა. მიჩიგანისა და ვერმონტის მარეგულირებელ კომისებთან თანამშრომლობამ საქართველოს მარეგულირებელი კომისიის მუშაობის გაუმჯობესებაში მნიშნვნელოვანი როლი შეასრულა.
