"რთველი 2011"-სთვის ამ ეტაპზე სახელმწიფო ბიუჯეტიდან 10 მილიონი ლარი გამოიყოფა.
ამის შესახებ მთავრობის დღევანდელი სხდომის დასრულების შემდეგ ჟურნალისტებს სოფლის მეურნეობის მინისტრმა, ბაკურ კვეზერელმა განუცხადა.
მისივე განმარტებით, მთავრობა წელს 128 ათასი ტონა ყურძნის მოსავალს ელოდება. ამასთან, კვეზერელის თქმით, 25 აგვისტოდან გურჯაანში შესაბამისი შტაბი ამოქმედდება, რომელიც "რთველის ღონისძიებების კოორდინაციას მოახდენს".
"წელს ველოდებით დაახლოებით 128 ათასი ტონა ყურძნის მოსავალს. 25 აგვისტოდან გვექნება შესაბამისი შტაბი ქალაქ გურჯაანში, რომელიც მოახდენს რთველის ღონისძიებების კოორდინაციას. შესაბამისად, ამ დროიდან გაიხსნება გარხნებიც, სადაც დაიწყება ყურძნის მიღების პროცესი. რთველისთვის ამ ეტაპზე 10 მილიონი ლარია გამოყოფილი, თუმცა საჭიროების შემთხვევაში დამატებითი თანხმების გამოყოფა მოხდება", - აღნიშნა კვეზერელმა.
შეგახსენებთ, რომ 25 აგვისტოდან "რთველი 2011" ოფიციალურად დაიწყება.
