ბათუმი საერთაშორისო შეხვედრას მასპინძლობს. 15-19 აგვისტოს ენერგეტიკული პარტნიორობის პროგრამის ფარგლებში, ბათუმში, საქართველოს ენერგეტიკისა და წყალმომარაგების მარეგულირებელი ეროვნული კომისიისა და აშშ-ს კენტუკის შტატის მარეგულირებელი კომისიის წარმომადგენლების მონაწილეობით რიგით მე-4 სამუშაო შეხვედრა გაიმართება.
როგორც "ჯი-ეიჩ-ენს" სემეკიდან აცნობეს, კენტუკის შტატის მარეგულირებელი კომისიისა და და აშშ-ს კომუნალური მომსახურების მარეგულირებელი ეროვნული ასოციაციის (NARUC) 6 კაციან დელეგაციას შტატის მარეგულირებელი კომისიის აღმასრულებელი დირექტორი ჯეფ დეროუნი უხელმძღვანელებს. ბათუმის მერთან და USAID-ის წარმომადგენლობასთან ერთად, შეხვედრას საქართველოს ენერგეტიკისა და წყალმომარაგების მარეგულირებელი ეროვნული კომისიის თავმჯდომარე გურამ ჩალაგაშვილი გახსნის.
დაგეგმილ შეხვედრაზე ყურადღება გამახვილდება ისეთ მნიშვნელოვან საკითხებზე, როგორიცაა ელექტროენერგიის განაწილების რეგულირება, მომხმარებელთა უფლებების დაცვა, წყლის სისტემის სტანდარტები და განვითარება, ტარიფების რეგულირება, საზოგადოებრივი ურთიერთობების გაუმჯობესება და სხვა.
აღნიშნული პარტნიორობის პროგრამა, რომელიც USAID-სა და აშშ-ს კომუნალური მომსახურების მარეგულირებელი ეროვნული ასოციაციის (NARUC) მხარდაჭერით უკვე რამდენიმე წელია ხორციელდება, გამოცდილების გაზიარებას ისახავს მიზნად. რაც მარეგულირებელი საქმიანობის გაუმჯობესებასა და ურთიერთობების გაღრმავებას უწყობს ხელს. ადგილობრივი ენერგეტიკული ბაზრის განვითარებისათვის მნიშვნელოვანია თანამშრომლობა საერთაშორისო მარეგულირებელ ორგანიზაციებთან, რაც USAID- ს შავი ზღვის მარეგულირებელი პარტნიორობის ინიციატივის ფარგლებში ხორციელდება. სემეკსა და NARUC-ს შორის პარტნიორობას საფუძველი 1999 წელს ჩაეყარა. მიჩიგანისა და ვერმონტის მარეგულირებელ კომისებთან თანამშრომლობამ მნიშნვნელოვანი როლი შეასრულა საქართველოს მარეგულირებელი კომისიის მუშაობის გაუმჯობესებაში.