სალიცენზიო და სანებართვო მოსაკრებლის გადახდა ცენტრალური ბიუჯეტის ნაცვლად, შესაძლოა, სსიპ სურსათის ეროვნული სააგენტოს ანგარიშზე მოხდეს.
სოფლის მეურნეობის სამინისტროს უკვე მზად აქვს პაკეტი „სალიცენზიო და სანებართვო მოსაკრებლების შესახებ" კანონში შესატანი ცვლილებების თაობაზე, რომლის თანახმადაც სალიცენზიო და სანებართვო მოსაკრებლის გადახდა არა საქართველოს ცენტრალურ ბიუჯეტში, არამედ უშუალოდ სურსათის ეროვნული სააგენტოს ან შემოსავლების სამსახურის ანგარიშზე მოხდება.
აღნიშნულით სააგენტოს მიერ სალიცენზიო და სანებართვო მომსახურებასთან დაკავშირებული თანხების ერთ ანგარიშზე კონსოლიდაცია განხორციელდება.
დღეისათვის მოქმედი კანონმდებლობის მიხედვით, სალიცენზიო და სანებართვო მოსაკრებლის გადახდა ცენტრალურ ანგარიშზე წარმოებს. ხოლო შემდგომ სახელმწიფო ბიუჯეტიდან გამოყოფილი სახსრებით სურსათის ეროვნული სააგენტოს დაფინანსება ხდება.
2010 წელს, ცენტრალურ ბიუჯეტში სალიცენზიო და სანებართვო მოსაკრებლის სახით 130 ათას 161 ლარი შევიდა.
სოფლის მეურნეობის სამინისტროს ინფორმაციით, კანონპროექტის მიღება ბიუჯეტის ხარჯვით ნაწილზე გავლენას მოახდენს. კერძოდ, შესაძლებელი გახდება სახელმწიფო ბიუჯეტის ხარჯვითი ნაწილის შემცირება ეროვნული სააგენტოს დაფინანსების ნაწილში საშემოსავლო ნაწილის შემცირების პროპორციულად.