"მარაბდა-თეთრიწყარო-წალკა-ახალქალაქი-კარწახის სარკინიგზო ხაზის" სამშენებლო სარეაბილიტაციო სამუშაოებისთვის დამატებით გამოყოფილი 575 მილიონი დოლარის ათვისება დაიწყო. აღნიშნული თანხის გამოყოფის შესახებ შეთანხმებას საქართველოს რეგიონული განვითარებისა და ინფრასტრუქტურის მინისტრმა რამაზ ნიკოლაიშვილმა და აზერბაიჯანის ტრანსპორტის მინისტრმა ზია მამედოვმა მაისში მოაწერეს ხელი.
აზერბაიჯანის მთავრობის მიერ გამოყოფილი თანხით დაიწყო თეთრიწყარო-წალკა-ახალქალაქის 120 კილომეტრიანი სარკინიგზო ხაზის სამშენებლო-სარეაბილიტაციო და ახალქალაქის სადგურის სამშენებლო სამუშაოები. აღნიშნული სამუშაოები 2012 წლის ბოლოსთვის დასრულდება. დღეს,საქართველოს რეგიონული განვითარებისა და ინფრასტრუქტურის მინისტრმა რამაზ ნიკოლაიშვილმა და საქართველოში ოფიციალური ვიზიტით მყოფმა, აზერბაიჯანის ტრანსპორტის სამინისტროს ღია სააქციო საზოგადოება "აზერროუდ სერვისი"-ს თავმჯდომარემ, ჯავიდ გურბანოვმა სარკინიგზო მონაკვეთებზე მიმდინარე სამუშაოები მოინახულეს.
პროექტი სამ ეტაპად ხორციელდება. ამჟამად დასასრულს უახლოვდება მარაბდა-თეთრიწყაროს 29 კილომეტრიან მონაკვეთზე მიმდინარე სარეაბილიტაციო სამუშაოები. უწყვეტ რეჟიმში მომდინარეობს ახალქალაქი-კარწახის მონაკვეთზე 25 კმ-იანი სრულიად ახალი სარკინიგზო ხაზისმშენებლობა. სარეაბილიტაციო სამუშაოების დასრულების შემდეგ აღდგენილირკინიგზის ხაზი ყველა პარამეტრით გაუთანაბრდება საერთაშორისოსტანდარტებს. პროექტზე 500-მდე ადამიანია დასაქმებული, რომელთაუმრავლესობა ადგილობრივი მოსახლეობაა.
სარკინიგზო ხაზის აღნიშნული მონაკვეთები "მარაბდა-თეთრწყარო-წალკა-ახალქალაქი-კარწახის სარკინიგზო ხაზის" რეაბილიტაცია-მშენებლობის პროექტის შემადგენელი ნაწილია, რომელიც "ბაქო-თბილისი-ყარსის ახალი სარკინიგზო ხაზის" მშენებლობის შესახებ საქართველოს, აზერბაიჯანსა და თურქეთს შორის გაფორმებული საერთაშორისო შეთანხმების ფარგლებში ხორციელდება და საქართველო-აზერბაიჯანი-თურქეთის, როგორც ინფრასტრუქტურული ასევე რეგიონული თვალსაზრისით უმნიშვნელოვანეს პროექტს წარმოადგენს. ახალი სარკინიგზო ხაზი ხელს შეუწყობს ტვირთბრუნვის გაზრდას და აზიიდან ევროპაში ტვირთების სწრაფად ტრანსპორტირებას.