"საქართველოს ფოსტა" ეფექტური მუშაობისთვის დამატებით ავტოსატრანსპორტო საშუალებებს შეიძენს. სატრანსპორტო საშუალებები - ტრაილერების, მსუბუქი ავტომობილების, მოტოციკლეტებისა და სპეციალური ტექნიკის, შეძენად მთავრობა კომპანიას სესხის სახით 1 მლნ. მლნ. ლარს გამოუყოფს.
სესხით სარგებლობის მაქსიმალურ ვადად 12 თვე განისაზღვრა, ხოლო სესხით სარგებლობის წლიური განაკვეთი კი - 2 %-ით. ამასთან წლიური პროცენტის გადახდა კომპანიამ უნდა განახორციელოს 6 თვეში ერთხელ, ხოლო სესხის ძირითადი თანხის დაფარვა შესაძლებელია განხორციელდეს ერთიანად სესხით სარგებლობის ვადის ბოლოს.
შეგახსენებთ, რომ შპს „საქართველოს ფოსტა" წარმოადგენს სახელმწიფოს 100% წილობრივი მონაწილეობით შექმნილ კომპანიას. ის ქართულ საფოსტო ბაზარზე მთავარი საფოსტო ოპერატორია. კომპანია ოპერირებს მთელი ქვეყნის მასშტაბით და ფლობს დაახლოებით 87 000 კვ.მ. მიწას და შენობებს საერთო ფართით 100 000 კვ.მ.
ეკონომიკისა და მდგრადი განვითარების სამინისტროს ინფორმაციით, კომპანიას აქვს ყველაზე სანდო საფოსტო მომსახურების გაწევის იმიჯი. მისი ოფისები მთელი ქვეყნის ტერიტორიაზეა განლაგებული.
"საწარმოთა მართვის სააგენტოს" საიტზე განთავსებული ინფორმაციის მიხედვით, "საქართველოს ფოსტაში" 1692 ადამიანია დასაქმებული. მისი საწესდებო კაპიტალი 38 მლნ. 878 ათას 317 ლარს შეადგენს.