შემოსავლების სამსახურის ინიციატივით, პროექტში ,,ალტერნატიული აუდიტი" დაბალი ბრუნვის მქონე მეწარმეებიც ჩაერთვნენ, რომელთა წლიური ბრუნვაც არ აღემეტება 100 000 ლარს. თბილისის მასშტაბით უკვე შერჩეულია 20 აუდიტორი, რომელთა პირადი მონაცემები გამოქვეყნებულია შემოსავლების სამსახურის ვებ გვერდზე (www.rs.ge). შერჩეულია 100 000 ლარამდე წლიური ბრუნვის მქონე 20 გადასახადის გადამხდელიც.
როგორც დღეს შემოსავლების სამსახურში გამართულ ბრიფინგზე გახდა ცნობილი, პროექტი მალე რეგონებშიც დაიწყება.შემოსავლების სამსახურის ინფორმაციით, ამ ეტაპზე მიმდინარეობს აუდიტორული კომპანიებიდან მიღებული 41 განაცხადის განხილვა, რომლებიც თბილისიდან, ბათუმიდან, ქუთაისიდან და რუსთავიდანაა შემოსული.
პროექტი "ალტერნატიული აუდიტი" მეწარმეს საშუალებას აძლევს თავად გადაწყვიტოს ვინ შეამოწმებს - შემოსავლების სამსახური თუ კერძო აუდიტორულ თუ საკონსულტაციო კომპანია. თუ იგი კერძო აუდიტს აირჩევს, შემოსავლების სამსახური მის დასკვნას აღიარებს და ბიზნესს ხელახლა აღარ შეამოწმებს.
აუდიტორის მიერ განხორციელებული შემოწმების შედეგად იწერება შესაბამისი დასკვნა, რომლის საფუძველზეც გადამხდელი უფლებამოსილია დააზუსტოს დეკლარაცია და აღიაროს საგადასახადო ვალდებულება, შესაბამისად, აღნიშნულ ნაწილში საგადასახადო სამართალდარღვევისათვის არ დაეკისრება ჯარიმა. ამასთან, აღნიშნული პერიოდი გადამხდელს ჩაეთვლება უკვე შემოწმებულად.
შემოსავლების სამსახურის ინფორმაციით, აუდიტორიული მომსახურების ანაზღაურება მოხდება გადასახადის გადამხდელის მიერ, რომლის ოდენობაც დგინდება ურთიერთშეთანხმების შედეგად, ამასთან, კომპენსაციის თანხა, მხოლოდ საგადასახადო აუდიტის ფარგლებში, არ უნდა აღემატებოდეს 1000 ლარს.