აჭარას კიდევ ერთი სამთო-სათხილამურო ბაზა შეემატება. აჭარის მთავრობის ინფორმაციით, ახალი კურორტის მშენებლობა ღომას მთაზე - ზღვის დონიდან 2200 მეტრ სიმაღლეზე იგეგმება.
აჭარის მთავრობის წარმომადგენლებთან და ექსპერტებთან ერთად ადგილზე ვითარების გაცნობის შემდეგ, ბიზნეზმენთა ჯგუფმა საზეიმოდ დააფუძნა ასოციაცია "წინაველა", რომლის ფუნქციაა კურორტის მშენებლობით დაინტერესებული ინვესტორების გაერთიანება. ასოციაციის პრეზენტაციას აჭარის მთავრობის აპარატის უფროსი ომარ მეგრელიძე დაესწრო.
მთა ღომაზე ინვესტორების მოზიდვისა და ინფრასტრუქტურის განვითარების მიზნით უკვე მიმდინარეობს 10-კილომეტრიანი გზის რეაბილიტაცია.
ღომა ქედისა და შუახევის მუნიციპალიტეტების ადმინისტრაციულ საზღვრებში შედის და იგი ცენტრალური მაგისტრალიდან 18 კილომეტრში მდებარეობს. ღომა აჭარაში სამკურნალო და მინერალური წყლებითაა ცნობილი. მისი ტურისტული პოტენციალი არა მარტო ზამთრის, არამედ - ზაფხულის კურორტის მოწყობის შესაძლებლობასაც იძლევა.
აჭარაში უკვე ფუნქციონირებს ქედლებისა და გომარდულის სამთო-სათხილამურო ბაზები. უახლოეს ხანებში ზამთრის ტურისტული კომპლექსის მშენებლობა გოდერძის უღელტეხილზეც დაიწყება. პერსპექტივაში მან კონკურენცია გუდაურს უნდა გაუწიოს. მათთან ერთად ერთიან ტურისტულ სისტემაში ღომას კურორტიც მოექცევა.