ფიზიკური პირები მათზე დარიცხული საგადასახადო დავალიანების შესახებ ინფორმაციას ავტომატურ რეჟიმში, საბანკო ოპერაციის განხორციელებისას მიიღებენ.
აღნიშნულთან დაკავშირებით ცვლილება "საგადასახადო კოდექსში" შედის, რომლის თანახმადაც, კომერციულ ბანკებს ფიზიკური პირების ინფორმირებულობის ვალდებულება დაეკისრებათ.
როგორც "ჯი-ეიჩ-ენთან" საუბარში მთავრობის საპარლამენტო მდივანმა გია ხუროშვილმა განმარტა, იყო შემთხვევები, როდესაც ადამიანს დასაფარი ჰქონდა დავალიანება და მან თავის დროზე არ დაადეკლარირა, რის გამოც, კანონმდებლობის თანახმად, საურავები დაერიცხა და თანხა საკმაოდ გაიზარდა.
"იმის გამო, რომ არ მოხდეს მსგავსი შემთხვევები და ფიზიკურ პირებს, რომლებსაც საგადასახადო დავალიანება აქვთ დაკისრებული ინფორმაცია სწრაფად მივაწოდოთ, დაიშვება გამონაკლისი და საგადასახადო საიდუმლოების შემცველი ინფორმაცია ბანკებს მიეწოდებათ", - აღნიშნა ხუროშვილმა.
მისივე განმარტებით, მოქალაქე, რომელიც ბანკში მივა ამა თუ იმ ტრანზაქციის ან ოპერაციის განსახორციელებლად, ბანკის წარმომადგენელი ავტომატურ რეჟიმში აცნობებს, რომ მას საგადასახადო დავალიანება ერიცხება.
"თუ პირი ეთანხმება მასზე დაკისრებულ დავალიანებას იგი ინფორმირებული იქნება დროულად და შესაბამისად დაადეკლარირებს, რითიც თავიდან აიცილებს საურავების დარიცხვას. თუ არ იზიარებს და მიაჩნია, რომ მას არასწორად აქვს დარიცხული დავალიანება, დროულად შესძლებს გასაჩივრებას", - აღნიშნა საპარლამენტო მდივანმა.
