ბიძინა ივანიშვილის წონის ფიგურის შემოსვლა პოლიტიკურ ასპარეზზე პრეზიდენტ მიხეილ სააკაშვილისთვის სასურველი ნამდვილად არ იქნება, - ამის შესახებ "ქრისტიან-დემოკრატების" წევრმა, ვიცე-სპიკერმა ლევან ვეფხვაძემ "ქართუ ჯგუფის" მიერ გავრცელებულ განცხადების შეფასებისას აღნიშნა.
"ივანიშვილის განცხადება ქართულ ძველ ანდაზას მახსენებს "რძალო შენ გეუბნები რძალო და მულო შენ გაიგონეო", ამ შემთხვევაში მიმართავს ნათელაშვილს და მას უფრო ანიტერესებს, რომ ქართულმა საზოგადებამ გაიგოს მისი პოზიცია სააკაშვილი მიმართ. ივანიშვილი ძალიან ღიად საუბრობს ელიტურ კორუფციაზე, რომელიც არის ხელისუფლებაში და იმ პრობლემებზე, რომელიც ხელისუფლებას აქვს საკუთარ საზოგადოებასთან", - აღნიშნა ვეფხვაძემ.
ოპოზიციონერი ვიცე-სპიკერის შეფასებით, ბიზნესმენის განცხადება არ ნიშნავს, რომ ის თვითონ საჯაროდ შემოდის პოლიტიკურ ასპარეზზე, მაგრამ მის მხრიდან ასე ღიად პოზიციის დაფიქსირება პირველად ხდება.
"ვფიქრობ ამ დონის მოთამაშის შემოსვლა პოლიტიკურ ასპარეზზე სააკაშვილისთვის ნამდვილად არ არის სასურველი, რადგან ირღვევა მთავარი ბალანსი. დღეს რაც სააკაშვილს უპირატესობა ჰქონდა ფულია და ამ შემთხვევაში ეს უპირატესობა აღარ იქნება", - აღნიშნა ვეფხვაძემ და აქვე დასძინა, რომ ივანიშვილისთვის ნათელაშვილის აქცია განცხადების გასაკეთებლად საბაბი უფრო იყო ვიდრე მიზეზი.
"მან გამოიყენა ეს აქცია იმისთვის, რომ სწორედ ასეთი პოზიცია დაეფიქსირებინა. ყოველ შემთხვევაში მართლაც არ არის შესაშურ მდგომარეობაში სააკაშვილი, როცა ასეთი წონის ფიგურა მისი ოპონენტი ხდება, რადგან მან 3-4 წელი შეალია მსგავს ფინანსური წონის ფიგურასთან - ბადრი პატარკაციშვილთან ბრძოლას და ეგონა, რომ ამოისუნთქა და და დაისვენა. მაგრამ, როგორც ჩანს ის შეცდომები და გაურკვეველი პოლიტიკა ბიზნესის მიმართ, რომელსაც მისი ხელისუფლება ახორცილებს ამ ქვეყანაში მტრებს ნამდვილად უმრავლებს", - აღნიშნა დეპუტატმა.
ამასთან, ვეფხვაძე ბიზნესმენის მიერ ოპოზიციის მიმართ გაკეთებულ კრიტიკულ განცხადებას გამოეხმაურა და აღნიშნა, რომ მართლაც არიან, როგორც საპარლამენტო, ისე არასაპარლამენტო ოპოზიციური ძალები, რომლებიც სააკაშვილის ხელისუფლების გახანგრძლივებას თავისდაუნებურად ხელს უწყობენ, თუმცა ივანიშვილის კრიტიკას "ქრისტიან-დემოკრატები" თავის თავზე არ იღებენ.
შეგახსენებთ, რომ "ქართუ ჯგუფის" პრესსამსახური "ლეიბორისტულ პარტიის" საპასუხოდ, რომლებიც ბიზნესმენ ბიძინა ივანიშვილს პრეზიდენტ სააკაშვილის ფინასურ დახმარებაში სდებენ ბრალს განცხადება გაავრცელა.
"სწორედ ახლანდელ ხელისუფლებას არ აძლევს ხელს არსებული ბალანსის დარღვევა, განსაკუთრებულ სიფრთხილეს იჩენს არჩევნების მოახლოებასთან დაკავშირებით, რომ ბიძინა ივანიშვილმა ვინმე არ დააფინანსოს და რომელიმე პოლიტიკურ ძალას მხარში არ ამოუდგეს იგი. სწორედ ამიტომაც, თუკი ნათელაშვილის ადრინდელ განცხადებებს ბეჭდური მედია და მეორე ხარისხოვანის ტელეარხები აშუქებდნენ ხოლმე; ამჯერად მისი ბრიფინგის შესახებ სიუჟეტი ხელისუფლების მიერ კონტროლირებადმა ყველა არხმა _ რუსთავი2-მა, იმედმა და საზოგადოებრივმა მაუწყებელმა დღის განმავლობაში რამდენჯერმე გადასცა. სწორედ სააკაშვილის მთავრობა ცდილობს, დაიხმაროს ქართველი ხალხი და ასევე დაარწმუნოს რუსეთის მთავრობაც, რათა მოიშოროს ივანიშვილი და მისგან თეორიულად მოსალოდნელი შესაძლო ხიფათი თავიდან აიცილოს", - ნათქვამია განცხადებაში.
