საქართველოს "თავისუფალი დემოკრატები" ამერიკის შეერთებული შტატების მთავრობასა და ხალხს პაკისტანში ჩატარებულ ანტი-ტერორისტულ ოპერაციას ულოცავენ.
"თავისუფალი დემოკრატების" აზრით, ეს უმნიშვნელოვანესი და წარმატებული ნაბიჯია კაცობრიობის წინააღმდეგ ჩადენილი ისეთი ბოროტების აღმოსაფხვრელად, რომელსაც ტერორიზმი და ადამიანთა მასობრივი განადგურება ჰქვია.
"მსოფლიო ვერასოდეს დაივიწყებს 2001 წლის 11 სექტემბერს, რომელსაც ათასობით უდანაშაულო, მშვიდობიანი მოქალაქის სიცოცხლე შეეწირა. ამერიკის შეერთებული შტატების მთავრობის წარმატებული ოპერაცია კიდევ ერთხელ ადასტურებს, რომ ტერორიზმი არასდროს დარჩება დაუსჯელი და, რომ საერთო ღირებულებებით და ფასეულობებით გაერთიანებული ცივილიზებული, დემოკრატიული მსოფლიო მუდამ დარაზმული იქნება ამ ბოროტების დასამარცხებლად",_ნათქვამია "თავისუფალი დემოკრატების" განცხადებაში.
მათი თქმით, ბენ ლადენის გარეშე მსოფლიო ბევრად უსაფრთხო გახდა. გადაიდგა უაღრესად მნიშვნელოვანი ნაბიჯი რეგიონის და მსოფლიოს სხვა ქვეყნების მშვიდობიანი, სტაბილური და დემოკრატიული განვითარებისათვის.
