სახალხო დამცველი გიორგი ტუღუში პარლამენტის მიერ მის შუალედური ანგარიშების "თაროზე შემოდებით" უკმაყოფილოა. ამის შესახებ დღეს, ტუღუშმა პარლამენტში "ქრისტიან-დემოკრატებთან" გამართულ შეხვედრაზე აღნიშნა.
"სახალხო დამცველის მიერ მომზადებული ოთხი შუალედური ანგარიშიდან პარლამენტში კომიტეტის სხდომაზე მხოლოდ დევნილების შესახებ ანგარიში მოისმინეს, დანარჩენი კი თაროზეა შემოდებული", - აღნიშნა ტუღუშმა.
მისივე თქმით, პარლამენტმა არ განიხილა ისეთი ქვეყნისთვის ისეთი მნიშვნელოვან სფეროებში დარღვევებზე მომზადებული ანგარიშები, როგორიც არის პენიტენციალური სისტემა, ბავშვთა უფლებები და წინასწარი დაკავების იზოლატორში არსებული ვითარება.
მისივე თქმით, სახალხო დამცველის მიერ საკანონმდებლო და აღმასრულებელი ხელისუფლებისთვის გასულ წელს 308 რეკომენდაცია გაიცა.
ამასთან, ტუღუშმა აღნიშნა, რომ სახალხო დამცველის რეკომენდაციების სრული იგნორირებით პროკურატურა და დევნილთა სამინისტრო გამოირჩევა.
