საქართველო დგას რეფორმებისა და დემოკრატიის წინსვლის გზაზე, მაგრამ გასაკეთებელი ჯერ კიდევ ბევრი რჩება, - ამის შესახებ თბილისში მყოფმა, ამერიკის შეერთებული შტატების სახელმწიფო მდივნის თანაშემწის მოადგილე თინა ქეიდენაუმ საქართველო-აშშ-ის ქარტიის ფარგლებში შექმნილი დემოკრატიული ჯგუფის სამუშაო შეხვედრის დასრულების შემდეგ გამართულ პრესკონფერენციაზე განაცხადა.
მისივე განმარტებით, პრობლემები რჩება, სასამართლო სისტემაში, ასევე საარჩევნო გარემოსა და კანონის უზენაესობის განმტკიცების კუთხით.
"შეერთებული შტატები ისევ იმ პოზიციაზე რჩება, რომ მხარი დაუჭიროს საქართველოს დემოკრატიულ განვითარებას. ამ წლების განმავლობაში საქართველომ რეფორმების თვალსაზრისით მნიშვნელოვანი გზა განვლო. დიდი სამუშაოებია გაწეული, თუმცა შესასრულებელი ჯერ კიდევ ბევრია", - განმარტა თინა ქეიდენაუმ.
აღსანიშნავია, რომ საქართველო-აშშ-ის ქარტიის ფარგლებში შექმნილი, დემოკრატიის საკითხებზე მომუშავე ჯგუფის შეხვედრა მთავრობის კანცელარიაში 4 საათს გაგრძელდა. მას ქართული მხრიდან საქართველოს საგარეო საქმეთა მინისტრის მოადგილე სერგი კაპანაძე და იუსტიციის მინისტრის მოადგილე თინა ბურჯალიანი ესწრებოდნენ.
