აშშ-ის წარმომადგენელთა პალატა რუსეთის წინააღმდეგ სანქციების მნიშვნელოვნად გამკაცრების შესახებ კანონპროექტს საბოლოო კენჭს დღეს, 16 სექტემბერს უყრის.
ამის შესახებ „რადიო თავისუფლების“ კორესპონდენტი ალექს რაუფოღლუ X-ზე წერს.
რესპუბლიკელმა კონგრესმენმა მაიკლ მაკკოლმა განაცხადა, რომ გადამწყვეტ კენჭისყრამდე კანონპროექტის განხილვას თავად გაუძღვება.
„წარმომადგენელთა პალატის სხდომათა დარბაზში დებატებს გავუძღვები ლინდსი გრემის სანქციების შესახებ კანონპროექტის საბოლოო მიღების საკითხზე“, - განაცხადა მაკკოლმა.
კანონპროექტი, სახელწოდებით „ლინდსი გრემის აქტი რუსეთისა და ირანის წინააღმდეგ სანქციების დაწესების შესახებ“, რუსეთის წინააღმდეგ სანქციების გამკაცრებას და იმ ქვეყნებისთვის დამატებითი ტარიფების დაწესების შესაძლებლობას ითვალისწინებს, რომლებიც რუსულ ენერგორესურსებს შეიძენენ.
პროცედურული ბარიერების გადალახვის შემდეგ კანონპროექტის თანაავტორმა, დემოკრატმა სენატორმა რიჩარდ ბლუმენტალმა უკრაინის თემს მიმართა. მან უკრაინის მხარდაჭერის გაგრძელების პირობა დადო და განაცხადა, რომ კანონპროექტი ვლადიმირ პუტინის სამხედრო მანქანაზე ზეწოლას გააძლიერებს.
„ჩვენ არ გავჩერდებით, ვიდრე უკრაინა დაცული და თავისუფალი სახელმწიფოდ არ იქნება“, -განაცხადა ბლუმენტალმა.
„აგრესორების შეჩერების ერთადერთი გზა მათი უკან დახევა და მათთვის სახეში გარტყმაა“, - განაცხადა სენატორმა.
გუშინ, 15 სექტემბერს აშშ-ის წარმომადგენელთა პალატის კომიტეტმა რუსეთის წინააღმდეგ სანქციების გამკაცრების შესახებ კანონპროექტს მხარი დაუჭირა.
კანონპროექტი აშშ-ის პრეზიდენტს უფლებას აძლევს, 100%-იანი ტარიფები დაუწესოს იმ ქვეყნებს, რომლებიც რუსულ ნავთობსა და გაზს იმპორტირებენ ან მოსკოვს საერთაშორისო სანქციებისთვის თავის არიდებაში ეხმარებიან.
დოკუმენტი ასევე მნიშვნელოვნად აფართოებს პერსონალურ სანქციებს რუსეთის სამხედრო ხელმძღვანელობისა და უცხოელი მომწოდებლების წინააღმდეგ, კრძალავს აშშ-ის ახალ ინვესტიციებს რუსეთის ეკონომიკაში, ითვალისწინებს ზომებს რუსული ნავთობის ტანკერების ე.წ. „ჩრდილოვანი ფლოტის“ წინააღმდეგ და ამკაცრებს რუსეთში იმ საქონლის ექსპორტზე დაწესებულ შეზღუდვებს, რომლებიც შესაძლოა იარაღის წარმოებისთვის გამოიყენებოდეს.
