რუსეთის საგარეო საქმეთა მინისტრმა სერგეი ლავროვმა განაცხადა, რომ რუსეთი აშშ-ისა და უკრაინის მონაწილეობით მოლაპარაკებების ახალი რაუნდის გამართვისთვის მზად არის.
„ჩვენ არასდროს გვითქვამს უარი მოლაპარაკებებზე. ყველა მოლაპარაკება, რომელიც გაიმართა, ჩვენი ინიციატივით არ შეწყვეტილა. ამიტომ, თუ ჩვენი კოლეგებიც მზად იქნებიან, ვფიქრობ, პროცესის განახლება სავსებით შესაძლებელია. ჩვენ სათქმელი ბევრი გვაქვს“, - განაცხადა ლავროვმა.
ლავროვის თქმით, ის ნიუ-იორკში გაეროს გენერალური ასამბლეის ფარგლებში აშშ-ის სახელმწიფო მდივან მარკო რუბიოს შეხვდება. გაერო-ს წევრი ქვეყნების საგარეო საქმეთა მინისტრების მონაწილეობით ღონისძიებები 22-28 სექტემბერს არის დაგეგმილი.
აშშ-ის პრეზიდენტ დონალდ ტრამპის სპეციალურმა წარმომადგენლებმა, რომლებიც სექტემბრის დასაწყისში მოსკოვსა და კიევში იმყოფებოდნენ, აშშ-ის, უკრაინისა და რუსეთის მონაწილეობით სამმხრივი მოლაპარაკებების განახლებისკენ მოუწოდეს. რუსეთისა და უკრაინის წარმომადგენლებმა განაცხადეს, რომ მოლაპარაკებები შესაძლოა ოქტომბერში განახლდეს. რუსეთის პრეზიდენტის თანაშემწის, იური უშაკოვის განცხადებით, მოსკოვი მოლაპარაკებების გასამართად აბუ-დაბის „სავსებით მისაღებ“ ადგილად მიიჩნევს.
2026 წლის იანვარ-თებერვალში რუსეთის, უკრაინისა და აშშ-ის მონაწილეობით მოლაპარაკებების სამი რაუნდი გაიმართა - ორი აბუ-დაბიში და ერთი ჟენევაში. ამის შემდეგ ამ ფორმატით შეხვედრები აღარ გამართულა.
ამერიკული მედიის ცნობით, რუსეთთან მოლაპარაკებების მთავარ წარმომადგენლად შესაძლოა CIA-ის დირექტორი ჯონ რეტკლიფი დაინიშნოს, რომელიც აგვისტოს ბოლოს მოსკოვში იმყოფებოდა.
