პენტაგონმა აშშ-ის თავდაცვის ინდუსტრიას მიმართა და სთხოვა, სასწრაფოდ გაზარდოს შეიარაღებისა და, განსაკუთრებით, საბრძოლო მასალის წარმოებისა და მიწოდების მოცულობები, რომლის მწვავე დეფიციტიც ირანთან ომის გამო შეიქმნა.

ამის შესახებ The Washington Post  წერს.

გამოცემის ცნობით, თავდაცვის მინისტრის მოადგილემ სტივ ფაინბერგმა ოთხშაბათს თავდაცვის ინდუსტრიის ხელმძღვანელებს წერილი გაუგზავნა, რომელშიც აღნიშნა, რომ მათ არაუმეტეს 21 დღე აქვთ, რათა წარმოადგინონ გეგმები „მნიშვნელოვნად დაჩქარებული, უფრო აგრესიული მიწოდების გრაფიკებისა და კრიტიკულად მნიშვნელოვანი საშუალებების წარმოების გაზრდის“ შესახებ.

„წლების განმავლობაში გაწელილი განვითარების ციკლები მიუღებელია. ჩვენ ახლა მკვეთრად უნდა დავაჩქაროთ ჩვენი პროგრამების გრაფიკები და გავაფართოოთ წარმოების შესაძლებლობები“, - აღნიშნა ფაინბერგმა.

გამოვემის ცნობით, ბოლო თვეების განმავლობაში პენტაგონმა უმსხვილეს ამერიკულ თავდაცვის კონტრაქტორებთან და ახალ სტარტაპებთან რამდენიმე „ჩარჩო შეთანხმების“ გაფორმების შესახებ განაცხადა. მათი მიზანია როგორც იაფი საბრძოლო მასალის, ისე თანამედროვე საჰაერო თავდაცვის საშუალებების, მათ შორის THAAD-ის სისტემებისა და Patriot-ის რაკეტა-ჩამჭრელების მიწოდების გაზრდა.

დარგის ექსპერტების განმარტებით, ეს ჩარჩო შეთანხმებები აშშ-ის მთავრობასა და კერძო სექტორის პარტნიორებს შორის გაფორმებული იურიდიული, თუმცა არასავალდებულო შეთანხმებებია, რომლებიც თავდაცვის სამინისტროს მიერ შეიარაღების შესყიდვის განზრახვაზე მიუთითებს. თუმცა მათი საბოლოო გაფორმებისთვის კონგრესის მხრიდან დაფინანსებაა საჭირო.

„წარმოების დასაჩქარებლად ინდუსტრიის ლიდერებთან პირდაპირი თანამშრომლობა სიახლე არ არის. ეს თავიდანვე იყო პრეზიდენტისა და მოქმედი მინისტრის მკაფიო მიზანი“, - განაცხადა პენტაგონის მთავარმა პრესსპიკერმა შონ პარნელმა.