უნგრეთის ყოფილმა პრემიერ-მინისტრმა ვიქტორ ორბანმა მხარდამჭერებს ქვეყნის დემოკრატიის აღდგენისკენ მოუწოდა. მისი თქმით, ახალი მთავრობის პირობებში დემოკრატია „განადგურებულია“.
"უნგრეთში ტირანიის ეპოქა დაიწყო", - თქვა მან.
ვიქტორ ორბანმა განცხადება მას შემდეგ გავრცელა, რაც მისმა პარტია „ფიდესმა“ გამოაცხადა, რომ პროკურორებმა პარტიის ოფისებში, სადაც ინტერნეტ სერვერებია განთავსებული, ჩხრეკა ჩაატარეს.
პროკურატურამ Reuters-ს განუცხადა, რომ საგამოძიებო მოქმედებები უკავშირდება ვიქტორ ორბანის მთავრობის პერიოდში ეროვნულ კულტურულ ფონდში სავარაუდო სახსრების მითვისებისა და სხვა დანაშაულების გამოძიებას.
ორბანმა ჟურნალისტებს უთხრა, რომ პროკურორებმა ამოიღეს სერვერები, რომლებზეც მისი პარტიის წევრების მონაცემთა ბაზა და ელექტრონული წერილები ინახებოდა. მისი თქმით, ეს პოლიტიკურად მოტივირებული ნაბიჯია, რომლის მიზანიცაა „ფიდესისთვის“ საქმიანობა სამართლებრივად შეუძლებელი გახდეს.
„ეროვნული კულტურული ფონდის საქმე ამისთვის მხოლოდ საბაბი იყო,“ - განაცხადა ორბანმა და დასძინა, რომ არანაირ კანონდარღვევას ადგილი არ ჰქონია.
ორბანმა ასევე აღნიშნა, რომ პრემიერ-მინისტრ პეტერ მადიარის ახალი ცენტრისტულ-მემარჯვენე მთავრობის მიერ საკონსტიტუციო ცვლილებების მიღების შემდეგ, რომლითაც პრეზიდენტისა და საკონსტიტუციო სასამართლოს თავმჯდომარის უფლებამოსილება შეწყდა, უნგრეთმა „დემოკრატიული სახელმწიფოს არსებობა შეწყვიტა“.
