ევროპარლამენტში რამდენიმე დეპუტატს, მათ შორის რუმინელ სკანდალურ პოლიტიკოსს დიანა შოშოაკეს, შესაძლოა სანქციები დაეკისროს პეტერბურგის საერთაშორისო ეკონომიკურ ფორუმში მონაწილეობისთვის, რომელსაც კრემლის წარმომადგენლებიც ესწრებოდნენ.
ამის შესახებ გამოცემები Luxemburger Wort და Digi24 წერენ.
ლუქსემბურგული გამოცემის ინფორმაციით, ევროპარლამენტის პრეზიდენტმა რობერტა მეცოლამ დისციპლინურ კომიტეტს წერილით მიმართა და ლუქსემბურგელი ევროპარლამენტარის ფერნან კარტაიზერის ქცევის შესწავლა მოითხოვა, პეტერბურგში მისი ვიზიტის გამო.
მეცოლა კომიტეტს მოუწოდებს, დაადგინოს, შეესაბამებოდა თუ არა კარტაიზერის, ან სხვა შესაძლო დეპუტატების ქმედებები ევროპარლამენტის წესებს.
განსაკუთრებული ყურადღება დაეთმო„დეკლარაციას“, რომელიც კარტაიზერმა პეტერბურგში წარადგინა და თითქოს ევროპარლამენტის წევრების სახელით იყო მომზადებული, თუმცა მასზე ხელმოწერები არ იყო. დოკუმენტში საუბარია ევროკავშირსა და რუსეთს შორის ურთიერთობების შესაძლო აღდგენაზე, ხოლო რუსეთის მიერ უკრაინის წინააღმდეგ მიმდინარე ომი არ არის ნახსენები.
ევროპარლამენტის პრეზიდენტის შეფასებით, დოკუმენტი „სერიოზულ შეშფოთებას იწვევს“, რადგან შესაძლოა შექმნას შთაბეჭდილება, თითქოს ევროპარლამენტსა და რუსეთის სახელმწიფო დუმას შორის არაოფიციალური საკომუნიკაციო არხი არსებობს.
მეცოლამ ასევე აღნიშნა, რომ კარტაიზერს ყველა შეხვედრის შესახებ ინფორმაცია არ ჰქონდა დეკლარირებული, მაშინ როცა ევროპარლამენტის წესების მიხედვით დეპუტატები ვალდებული არიან აცნობონ ყველა იმ ვიზიტზე, რომლის ხარჯებიც მესამე მხარის მიერ ფინანსდება.
თუ კომიტეტი დაასკვნის, რომ დარღვეულია ქცევის კოდექსი, კარტაიზერს შესაძლოა დაეკისროს ჯარიმა ან აეკრძალოს ევროპარლამენტის სახელით საერთაშორისო ვიზიტებში მონაწილეობა.
თავად პოლიტიკოსმა განაცხადა, რომ ინფორმაცია მედიისგან შეიტყო. მისი თქმით, „არაფერი აქვს დასამალი“ და საკუთარ საქმიანობას „ამაყად“ აფასებს.
ცნობისთვის, დაახლოებით ერთი წლის წინ ფერნან კარტაიზერი მოსკოვშიც იმყოფებოდა, სადაც „მშვიდობისა და ადამიანის უფლებების“ საკითხებზე ისაუბრა. მაშინ ის „ევროპელი კონსერვატორებისა და რეფორმისტების“ ჯგუფის წევრი იყო, თუმცა ვიზიტის შემდეგ ჯგუფიდან გარიცხეს.
რუმინული Digi24-ის ინფორმაციით, ანალოგიური მოკვლევა შესაძლოა დაიწყოს დიანა შოშოაკეს მიმართაც. საკითხის განხილვა, სავარაუდოდ, მომავალ კვირას გაიმართება.
შოშოაკემ განაცხადა, რომ მის წინააღმდეგ გამოძიების დაწყების საფუძველი არ არსებობს, რადგან ვიზიტი საკუთარი სახსრებით დააფინანსა.
მისი თქმით, ეს უსაფუძვლო იქნებოდა, რადგან რუსეთი „აკრძალული ქვეყანა არ არის“ და ვერავინ აუკრძალავს მას საერთაშორისო ღონისძიებებში მონაწილეობას, თუ ევროკავშირის ბიუჯეტი ან რუსეთის მხარე მის ხარჯებს არ ფარავს.
