ბელარუსის პრეზიდენტმა ალექსანდრ ლუკაშენკამ განაცხადა, რომ უკრაინას ბელარუსის მხრიდან არანაირი საფრთხე არ ემუქრება და ქვეყნებს შორის სამხედრო ესკალაციის საფუძველი არ არსებობს.
მისი თქმით, თუ უკრაინის პრეზიდენტი ვოლოდიმირ ზელენსკი მის წინა განცხადებებზე განაწყენდა, ის მზად არის ბოდიში მოიხადოს.
მან ასევე აღნიშნა, რომ ბელარუსი არ გეგმავს უკრაინის წინააღმდეგ სამხედრო მოქმედებებს და დაინტერესებულია რეგიონში დაძაბულობის შემცირებით.
ლუკაშენკას თქმით, უკრაინის პრეზიდენტის ვოლოდიმირ ზელენსკის შესახებ მისი კომენტარები გამოწვეული იყო უკრაინის მხრიდან მუქარებით.
„შესაძლოა, სადღაც გადავაჭარბე, მაგრამ ეს იყო პასუხი ზელენსკის უსაფუძვლო განცხადებებზე - დიახ, ჩვენ გვაქვს 500 სამიზნე, დიახ, ვიცით, სად არის ლუკაშენკა. ხვალ რაკეტებითა და დრონებით დავესხმებით თავს –-მე ჩუმად ვიყავი. ყველას გაუკვირდა ჩემი დუმილი. მესმოდა, ადამიანი ამხელა ზეწოლაშია, ახალგაზრდაა, გამოუცდელი, სამხედრო გამოცდილება არ აქვს, შესაძლოა, რაღაც თავში რიგზე არ იყო. ვჩუმდებოდი, მაგრამ როდესაც მუქარა დაიწყეს, იძულებული გავხდი, მეპასუხა. ზელენსკი თუ განაწყენებულია, ბოდიშს ვუხდი ამ სიტყვებისთვის. შესაძლოა, ეს არ ღირდა, იმის გათვალისწინებით, რომ ბოლოს და ბოლოს, იბრძვის. შესაძლოა, ამაზე ასე მკაცრად არ უნდა მესაუბრა. მეორე მხრივ, მან უნდა გაიგოს, ჩვენთან ხშირად ამბობენ - რასაც დასთეს, იმას მოიმკიო“, აღნიშნა ბელარუსის პრეზიდენტმა.
ცნობისთვის, მანამდე ვოლოდიმირ ზელენსკიმ განაცხადა, რომ უკრაინას ბელარუსის ტერიტორიაზე 500 სამიზნე აქვს განსაზღვრული. საპასუხოდ კი ალექსანდრ ლუკაშენკომ აღნიშნა, რომ მინსკს უკრაინაში ერთი „ძალიან სერიოზული“ სამიზნის კოორდინატები აქვს და დარტყმით დაიმუქრა.
