აშშ-ის პრეზიდენტს, დონალდ ტრამპსა და ისრაელის პრემიერ-მინისტრ ბენიამინ ნეთანიაჰუს შორის სატელეფონო საუბარი დაძაბულ ვითარებაში გაიმართა და ასახავდა მზარდ უთანხმოებას ირანთან ომის შემდგომი ნაბიჯების თაობაზე. ინფორმაციას CNN და Axios წყაროებზე დაყრდნობით ავრცელებენ.
წყაროების ცნობით, 19 მაისს გამართული საუბარი დაძაბული იყო და ნათლად გამოჩნდა განსხვავებული ხედვები ირანთან მიმართებით შემდგომი მოქმედებების შესახებ.
მანამდე, კვირას გამართულ საუბარში ტრამპმა განაცხადა, რომ მზად იყო კვირის დასაწყისში ირანზე ახალი დარტყმებისთვის, თუმცა მოგვიანებით ეს გადაწყვეტილება შეაჩერა და დიპლომატიური შეთანხმების მიღწევის შესაძლებლობას მიანიჭა უპირატესობა.
ამავე დროს, ნეთანიაჰუ უკმაყოფილოა მიმდინარე მოლაპარაკებებით და მიიჩნევს, რომ ისინი ირანს დროს აძლევს, რის გამოც მხარს უჭერს უფრო მკაცრ სამხედრო მოქმედებებს.
როგორც იუწყებიან, სამშაბათს გამართულ საუბარში, ისრაელის ლიდერმა პირდაპირ უთხრა ტრამპს, რომ დარტყმების გადადება შეცდომაა და საჭიროა თავდაპირველი გეგმის მიხედვით მოქმედება.
ისრაელის ანონიმური მაღალჩინოსნის განცხადებით, „უთანხმოება აშკარა იყო“.
კიდევ ერთი წყაროს ცნობით, ისრაელის სხვა ოფიციალური პირებიც მიიჩნევენ, რომ ირანს არ უნდა მიეცეს შესვენების საშუალება და უკმაყოფილონი არიან ტრამპის მიერ მოლაპარაკებების პროცესისადმი მიდგომით.
არაოფიციალური ინფორმაციით, სამხედრო სტრუქტურებმა ტრამპს ირანის წინააღმდეგ შესაძლო სამხედრო მოქმედებების სხვადასხვა ვარიანტიც წარუდგინეს.
20 მაისს ტრამპმა განაცხადა, რომ თუ მოლაპარაკებები შეთანხმებით არ დასრულდება, აშშ-მა, შესაძლოა, ირანზე უფრო ძლიერი დარტყმები მიიტანოს.
