იტალიის პრემიერ-მინისტრი ჯორჯია მელონი კვირას ქალაქ მოდენაში გაემგზავრა. იტალიის პრემიერმა აღნიშნული გადაწყვეტილება მას შემდეგ მიიღო, რაც ქალაქის ცენტრში ავტომობილი ქვეითებს შეეჯახა და რვა ადამიანი დაშავდა.
ინფორმაციას Reuters ავრცელებს.
მედიის ცნობით, მოდენაში გამგზავრების გამო მელონიმ კვიპროსის პრეზიდენტთან, ნიქოზიაში დაგეგმილი შეხვედრა გააუქმა.
მოდენას ასევე ეწვევა იტალიის პრეზიდენტი სერჯო მატარელაც.
მოდენას პროკურატურის განცხადებით, ეჭვმიტანილის წინააღმდეგ გამოძიება მასობრივი მკვლელობის მცდელობისა და სხეულის დაზიანების მუხლებით მიმდინარეობს.
უწყების ინფორმაციით, ამ ეტაპზე დგინდება თავდასხმის შესაძლო მოტივი.
მოდენას მერის, მასიმო მეცეტის თქმით, თავდამსხმელი 2022 წელს ფსიქიკური პრობლემების გამო მკურნალობდა, რის შემდეგაც ის ექიმების ყურადღების არეალიდან გაქრა.
ცნობისათვის, 16 მაისს მოდენას ცენტრში ავტომობილის მძღოლი მაღალი სიჩქარით ქვეითთა ჯგუფში შეიჭრა .
ინციდენტის შედეგად რვა ადამიანი დაშავდა, მათგან ოთხის მდგომარეობა მძიმეა. სამ დაშავებულს რეანიმაცია ადგილზე ჩაუტარდა, ხოლო ორ პაციენტს ფეხების ამპუტაცია დასჭირდა.
