კრემლში აცხადებენ, რომ რვლადიმირ პუტინი მოლაპარაკებებისთვის ყველასთან მზად არის, მათ შორის ევროპელ ლიდერებთანაც, თუმცა პირველი ნაბიჯის გადადგმას თავად არ აპირებს.
ამის შესახენ კრემლის პრესპიკერმმა დმიტრი პესკოვმა განაცხადა.
მანამდე Financial Times-მა გაავრცელა ინფორმაცია, რომ ევროკავშირის ლიდერები რუსეთთან შესაძლო მოლაპარაკებებისთვის ემზადებიან. გამოცემის ცნობით, ევროკავშირში უკმაყოფილონი არიან უკრაინაში ომის დასრულების შესახებ მოლაპარაკებების მიმდინარეობით, რომელსაც აშშ ხელმძღვანელობდა.
დმიტრი პესკოვს სთხოვეს კომენტარი გაეკეთებინა ევროპული საბჭოს პრეზიდენტ ანტონიუ კოშტას განცხადებაზე, რომელმაც ევროკავშირის ლიდერებთან რუსეთთან შესაძლო სამომავლო მოლაპარაკებების საკითხი განიხილა.
„ჩვენ მზად ვართ დიალოგის გასაგრძელებლად იმდენად, რამდენადაც ამისთვის ევროპული მხარე იქნება მზად. თუმცა, როგორც პუტინს არაერთხელ უთქვამს, იმ პოზიციის გათვალისწინებით, რომელიც ევროპელებმა დაიკავეს, ასეთი კონტაქტების ინიციატორები ჩვენ არ ვიქნებით“, - განაცხადა პესკოვმა.
მისივე თქმით, ვლადიმირ პუტინი „მზად არის ყველასთან მოლაპარაკებისთვის “ და ამის შესახებ არაერთხელ უსაუბრია.
„რუსული მხარე არ ყოფილა ჩვენი ურთიერთობების ნულამდე დაყვანის ინიციატორი. ამის ინიციატორი სწორედ ბრიუსელი და ცალკეული ევროპული დედაქალაქები იყვნენ“, - განაცხადა დმიტრი პესკოვმა.
