უნგრეთის პრემიერ-მინისტრმა ვიქტორ ორბანმა, რომელიც საპარლამენტო არჩევნების შემდეგ თანამდებობას ტოვებს, განაცხადა, რომ უარს ამბობს დეპუტატის მანდატზე, თუმცა მზად არის კვლავ უხელმძღვანელოს თავის პარტიას — "ფიდესს".
ორბანის თქმით, გაიმართა „ფიდესის“ სხდომა, სადაც გადაწყდა,რომ საპარლამენტო ფრაქციას გერგეი გულიაში უხელმძღვანელებს, ხოლო თავად ორბანი დეპუტატის მანდატზე უარის თქმას გეგმავს.
„მანდატი, რომელიც მივიღე როგორც ‘ფიდესი — ქრისტიან-დემოკრატების’ სიის ლიდერმა, რეალურად ‘ფიდესის’ საპარლამენტო მანდატია, ამიტომ გადავწყვიტე მისი დაბრუნება. ახლა ის პარლამენტში კი არა, ეროვნული მოძრაობის რეორგანიზებისთვის არის საჭირო“, — განაცხადა ორბანმა.
მან ასევე აღნიშნა, რომ მომდევნო კვირაში პარტია ჩაატარებს საერთოეროვნულ შეკრებას, ხოლო ხელმძღვანელობის ასარჩევი ყრილობა ივნისამდე გადაიდო.
„თითქმის ოთხი ათწლეულია ვხელმძღვანელობ ჩვენს საზოგადოებას. ამ დროის განმავლობაში გვქონდა როგორც წარმატებები და წარუმატებლობები, ისე არჩევნებში გამარჯვებები და მარცხები. მაგრამ ერთი რამ უცვლელი დარჩა: ეს გუნდი ყოველთვის იყო უნგრეთის ყველაზე შეკრული და ერთიანი პოლიტიკური საზოგადოება — და ეს ერთიანობა ახლა ძალიან სჭირდება უნგრეთს,“ - განაცხადა ორბანმა.
