შვეიცარიაში დააკავეს ბარის მფლობელი, სადაც ახალი წლის ღამეს გაჩენილი ხანძრის შედეგად 40 ადამიანი დაიღუპა.

მედიის ცნობით, ბარის მფლობელი, საფრანგეთის მოქალაქე ჟაკ მორეტი, დააკავეს. პროკურორებმა განაცხადეს, რომ ჟაკ მორეტი, შესაძლოა, მართლმსაჯულებას გაქცეოდა.

გაირკვა, რომ ბარს ბოლო ხუთი წლის განმავლობაში ხანძარსაწინააღმდეგო შემოწმება არ ჩატარებია.

შვეიცარიელმა პროკურორებმა საქმე აღძრეს მორეტისა და მისი მეუღლის, ჯესიკას წინააღმდეგ, რომელიც ბარის თანამფლობელია.

ვალეს კანტონის პროკურატურამ მათ ბრალი წაუყენა გულგრილობაში, რამაც სიკვდილი და დაზიანებები გამოიწვია.

სათხილამურო კურორტ კრანს-მონტანაში ბარ „Le Constellation“-ში გაჩენილ ხანძარს 40 ადამიანი ემსხვერპლა, მათ შორის ბევრი არასრულწლოვანი. კიდევ 116-მა ადამიანმა დამწვრობა და დაზიანებები მიიღო.

გამომძიებლების თქმით,  ვარაუდით, ახალი წლის აღსანიშნავად მყოფმა ადამიანებმა შამპანურის ბოთლები, რომლებზეც შუშხუნები იყო დამაგრებული, მაღლა ასწიეს, რის შემდეგაც ბარის ჭერზე დამონტაჟებულ ხმის საიზოლაციო ქაფს ცეცხლი გაუჩნდა. შვეიცარიაში დღეს ეროვნული გლოვის დღეა და ხანძრის შედეგად დაღუპულებს წუთიერი დუმილით პატივი მიაგეს. მსხვერპლთა უმეტესობა ახალგაზრდა იყო. დაშავებულთაგან კი უმრავლესობას მძიმე დამწვრობა აქვს. ისინი შვეიცარიასა და სხვა ევროპულ ქვეყნებში მკურნალობენ.