მინეაპოლისში, აშშ-ის იმიგრაციისა და საბაჟო სამსახურის (ICE) აგენტის მიერ 37 წლის ნიკოლ გუდის მკვლელობის შემდეგ ამერიკის 10-ზე მეტ ქალაქში საპროტესტო აქციები გაიმართა.
მედიის ცნობით, 7 იანვრის საღამოს, მინეაპოლისში სროლის ადგილას დროებითი მემორიალი გამოჩნდა და რამდენიმე ათასი ადამიანი შეიკრიბა.
ხუთშაბათს დილით, დაახლოებით 1000 მომიტინგე შეიკრიბა ფედერალური შენობის წინ, სადაც საიმიგრაციო სასამართლოა განთავსებული. შეკრენილები ფედერალურ აგენტების მისამართით სკანდირებდნენ: „სირცხვილო“ და „მკვლელები“.
მედიის ცნობით, სამართალდამცველებმა მომიტინგეების წინააღმდეგ ცრემლსადენი გაზი და წიწაკის სპრეი გამოიყენა.
ტრამპის მოწინააღმდეგეებმა მოქალაქეებს საპროტესტო აქციებისკენ მოუწოდეს, გავრცელებული ინფორმაციით, ხალხი ქუჩებში 10-ზე მეტ ქალაქში გამოვიდა.
აშშ-ის შიდა უსაფრთხოების დეპარტამენტის ცნობით, მინეაპოლისში ICE-ის ოფიცრები სამსახურეობრივ ოპერაციებს ატარებდნენ, როდესაც რამდენიმე ადამიანმა მათთვის ხელის შეშლა დაიწყო, ხოლო ერთმა ქალმა ICE-ის ოფიცრებისთვის მანქანით დაჯახება სცადა.
დეპარტამენტის განცხადებით, ICE-ის ოფიცერმა, საკუთარი და კოლეგების დაცვის მიზნით, რამდენჯერმე გაისროლა.
„მან გამოიყენა წვრთნების დროს შეძენილი უნარები და გადაარჩინა საკუთარი და კოლეგების სიცოცხლე,“ - აცხადებენ უწყებაში.
ამავდროულად, ქალაქის მერმა, ჯეიკობ ფრეიმ, ფედერალური აგენტების ქმედებებს „სახიფათო და უპასუხისმგებლო“ უწოდა.
მერმა განაცხადა, რომ ინციდენტის ვიდეო არ ადასტურებს ICE-ის ვერსიას.
„საქმე უსაფრთხოებას არ ეხება. საქმე ეხება ქაოსსა და შიშს, რომელსაც ფედერალური ხელისუფლებას განზრახ შემოაქვს ჩვენს ქუჩებში,“ - განაცხადა მერმა.
აშშ-ის შიდა უსაფრთხოების მდივანმა, კრისტი ნოემმა ნიუ იორკში გამართულ პრესკონფერენციაზე განაცხადა, რომ საიმიგრაციო და საბაჟო სამსახურის ოფიცერი მინეაპოლისში მომზადების შესაბამისად მოქმედებდა.
„ხშირად არჩეული თანამდებობის პირების პოლიტიკამ და რიტორიკამ ხალხი გაყო და ერთმანეთის წინააღმდეგ დააპირისპირა. ჩვენი საქმეა, დავიცვათ ყველა ამერიკელი, მიუხედავად იმისა, თუ სად ცხოვრობენ ისინი ამ ქვეყანაში. ოფიცერმა სათანადოდ იმოქმედა საკუთარი თავის, სხვა სამართალდამცავი ორგანოების თანამშრომლებისა და ტერიტორიაზე მყოფი სხვა პირების დასაცავად“,- განაცხადა ნოემმა.
მოკლული 37 წლის ქალს სამი შვილი დარჩა. მედიის ცნობით, ნიკოლი ქალაქში საცხოვრებლად ახლახან გადავიდა. ის პოეტი და პრესტიჟული ჯილდოს მფლობელი იყო.
