საერთაშორისო ოლიმპიური კომიტეტის (IOC) პრეზიდენტმა კირსტი კოვენტრიმ განაცხადა, რომ რუს სპორტსმენებს იტალიაში გასამართ ზამთრის ოლიმპიურ თამაშებზე მათი დროშის ქვეშ გამოსვლის უფლება არ მიეცემათ, მაშინაც კი, თუ უკრაინაში ომი იმ დროისათვის დასრულებული იქნება.
კოვენტრიმ იტალიურ გამოცემა Corriere della Sera-ს განუცხადა, რომ მაშინაც კი, თუ უკრაინასა და რუსეთს შორის ოლიმპიადამდე სამშვიდობო შეთანხმება იქნება მიღწეული, ეს არ შეცვლის გადაწყვეტილებას იმის შესახებ, თუ როგორ მიეცემათ რუსებს შეჯიბრში მონაწილეობის უფლება.
„ამ ეტაპზე ეს არაფერს შეცვლის, რადგან გადაწყვეტილება უკვე მიღებულია: რუს სპორტსმენებს ინდივიდუალურ შეჯიბრებებში მხოლოდ ნეიტრალური სპორტსმენების სტატუსით მონაწილეობის უფლება ექნებათ“, - განაცხადა კოვენტრიმ.
2022 წლის თებერვალში რუსეთის მიერ უკრაინაში შეჭრის შემდეგ, საერთაშორისო ოლიმპიურმა კომიტეტმა რუს და ბელარუს სპორტსმენებს შეჯიბრებებში მონაწილეობა დროებით აუკრძალა.
გასული წლის სექტემბერში გადაწყდა, რომ რუსებსა და ბელარუსებს იტალიაში გასამართ ოლიმპიურ თამაშებზე მხოლოდ ინდივიდუალურ შეჯიბრებებში ნეიტრალური სპორტსმენების სტატუსით მონაწილეობის უფლება მიეცემათ, საკუთარი დროშისა და ჰიმნის გარეშე.
ოლიმპიური თამაშები, რომლებიც მილანსა და კორტინე დ’ამპეცოში გაიმართება, ოფიციალურად 6 თებერვალს დაიწყება.
