აშშ-ის პრეზიდენტმა დონალდ ტრამპმა განაცხადა, რომ გასულ კვირას ვენესუელაში „მნიშვნელოვანი ობიექტი“ გაანადგურეს.
„ჩვენ ახლახან გამოვიყვანეთ მწყობრიდან – არ ვიცი, წაიკითხეთ თუ არა, ან ნახეთ თუ არა – მათ აქვთ დიდი ქარხანა ან დიდი ობიექტი, საიდანაც გემები შემოდიან. ჩვენ ის ორი ღამის წინ გამოვიყავნეთ მწყობრიდან. ჩვენ მათ ძალიან ძლიერად დავარტყით“, - თქვა ტრამპმა.
მას დარტყმის შესახებ სხვა დამატებითი დეტალები არ გაუხმაურებია. დეტალების შესახებ საუბარზე ასევე უარი თქვა თეთრმა სახლმა.
ასევე ვენესუელაში არ გავრცელებულა ინფორმაცია მნიშვნელოვანი ობიექტის განადგურების შესახებ.
თუმცა, თუ ეს განცხადება სიმართლეს შეესაბამება, ეს იქნება აშშ-ის პირველი სამხედრო თავდასხმა ვენესუელის ტერიტორიაზე.
აქამდე აშშ-მა მხოლოდ კარიბის ზღვის აუზსა და აღმოსავლეთ წყნარ ოკეანეში გემებზე თავდასხმა განახორციელა, თუმცა დონალდ ტრამპი ვენესუელოს ტერიტორიაზეც იერიშის მიტანით იმუქრებოდა.
შესაძლო სამიზნეები შეიძლება ყოფილიყო ნარკოტიკების წარმოების ობიექტები ან ნარკოტიკებით ვაჭრობის ცნობილი მარშრუტები.
