მექსიკის საზღვაო ძალების თვითმფრინავი, რომელსაც დამწვრობის შედეგად მიღებული პაციენტები გადაჰყავდა, აშშ-ში, ტეხასის შტატში, გალვესტონის ყურის წყლებში ჩამოვარდა.
ბორტის გალვესტონის ყურეში ჩავარდნის შედეგად, სულ მცირე ხუთი ადამიანი, მათ შორის ორი წლის ბავშვი დაიღუპა. ინფორმაციას CNN ავრცელებს.
მაშველებმა ორი ადამიანი გადაარჩინეს, თუმცა მათი მდგომარეობის შესახებ ინფორმაცია ჯერ არ ვრცელდება.
კიდევ ერთი მგზავრი დაკარგულია. სამძებრო სამუშაოები გალვესტონის დასავლეთით მდებარე წყლებში გრძელდება.
მექსიკის საზღვაო ძალების სარდლობამ ოფიციალურად დაადასტურა, რომ მცირე ზომის ორძრავიან ტურბორეაქტიულ თვითმფრინავში რვა ადამიანი იმყოფებოდა: ეკიპაჟის ოთხი წევრი და ოთხი სამოქალაქო პირი.
გალვესტონის ოლქის შერიფის, ჯიმი ფულენის თქმით, თვითმფრინავი დამწვრობის მქონე პაციენტებს სამედიცინო დახმარებისთვის გადაჰყავდა.
თვითმფრინავი მექსიკის ქალაქ მერიდადან აფრინდა და ჰიუსტონიდან დაახლოებით 80 კილომეტრში მდებარე გალვესტონ-სქოულზის საერთაშორისო აეროპორტისკენ მიემართებოდა.
ავიაკატასტროფის ერთ-ერთ მიზეზად სავარაუდოდ რთული მეტეოროლოგიური პირობები სახელდება.
