აშშ-ის იუსტიციის დეპარტამენტმა პარასკევს გამოაქვეყნა დოკუმენტი, რომელიც ათასობით გვერდს მოიცავს, ფინანსისტ ჯეფრი ეპშტეინის საქმიდან, რომელიც პედოფილიაში იყო ბრალდებული, თუმცა მრავალ ცნობილ და გავლენიან ადამიანთან ინარჩუნებდა ურთიერთობებს.
დეპარტამენტი ვალდებული იყო მასალები გამოექვეყნებინა ერთი თვის წინ მიღებული კანონის თანახმად.
იუსტიციის დეპარტამენტის ვებგვერდზე პირველი დოკუმენტების განთავსებისთანავე, ვიზიტორების იმდენად დიდი შედინება დაფიქსირდა, რომ მათი ელექტრონულ რიგში მოთავსება გახდა საჭირო.
გენერალური პროკურორის მოადგილემ, ტოდ ბლანშმა, პარასკევს დილით Fox News-ის ეთერში განაცხადა, რომ იუსტიციის დეპარტამენტი გეგმავს რამდენიმე ასეული ათასი გვერდის დაუყოვნებლივ გამოქვეყნებას, ხოლო მომდევნო რამდენიმე კვირის განმავლობაში კიდევ რამდენიმე ასეული ათასი გვერდის გასაჯაროვებას.
Reuters-ის ცნობით, პირველი გამოქვეყნებული სერია 300 000-ზე მეტ გვერდს შეიცავს.
ეპშტეინის საქმის დოკუმენტების შესახებ კანონში ნათქვამია, რომ იუსტიციის დეპარტამენტს, საქმის მასალების გამოქვეყნებისას, შეუძლია და ვალდებულია დაუშვას გამონაკლისი მათი იმ ნაწილებისთვის, რომლებიც შეიცავს პედოფილი ფინანსისტის დანაშაულის მსხვერპლთა შესახებ პერსონალურ ინფორმაციას.
„ჩვენ განვიხილავთ ყველა დოკუმენტს, რომელსაც ვაქვეყნებთ, რათა უზრუნველვყოთ, რომ თითოეული მსხვერპლი დაცული იყოს იმ დონემდე, რამდენადაც ის უნდა იყოს დაცული: სახელი, ვინაობა, ისტორია“, - განაცხადა ტოდ ბლანშმა.
ეპშტეინის ფაილების გამჭვირვალობის შესახებ კანონი აშშ-ის კონგრესმა თითქმის ერთხმად 19 ნოემბერს მიიღო, იუსტიციის დეპარტამენტს მასალების გამოსაქვეყნებლად 30 დღე მიეცა.
ფინანსისტ ჯეფრი ეპშტეინს სექსუალური ტრეფიკინგისთვის ბრალი 2019 წელს წაუყენეს. ბრალის თანახმად, მან ათობით არასრულწლოვანი გოგო სექსუალურ ტრეფიკინგში ჩართო. ეპშტეინი ციხეში გარდაიცვალა, ოფიციალური ინფორმაციით, მან სიცოცხლე სუიციდით დაასრულა. სექსუალური ტრეფიკინგის ბრალდებით დააკავეს ასევე ეპშტეინის პარტნიორი ქალი გილეინ მაქსველი, რომელსაც 20 წლით თავისუფლების აღკვეთა მიუსაჯეს.
გასულ წელს გამოქვეყნებულ ეპშტეინის საქმის სასამართლო დოკუმენტებში დასახელებული იყო რამდენიმე ცნობილი სახელი, რომლებსაც ბრალდებულთან ჰქონდათ კავშირი. ერთ-ერთ დოკუმენტში ფიგურირებს დონალდ ტრამპის სახელიც, თუმცა მის მართლსაწინააღმდეგო ქმედებებზე საუბარი არ არის. ცნობილია, რომ წლების წინ დონალდ ტრამპს ურთიერთობა ჰქონდა ჯეფრი ეპშტეინთან, რომელიც ფინანსისტად მუშაობდა ნიუ იორკსა და ფლორიდაში.
