აშშ-ში უკრაინის და ამერიკულ მხარეებს შორის კონსულტაციები ევროპელი პარტნიორების მონაწილეობით გაიმართება. უკრაინის დელეგაციაში ეროვნული უსაფრთხოებისა და თავდაცვის საბჭოს მდივანი რუსტემ უმეროვი და უკრაინის შეიარაღებული ძალების გენერალური შტაბის უფროსი ანდრიი გნატოვი შედიან.
„დღეს შეერთებულ შტატებში, გენერალ-ლეიტენანტ ანდრიი გნატოვთან ერთად, ჩვენ დავიწყებთ კონსულტაციების შემდეგ რაუნდს ამერიკულ მხარესთან. ამერიკული მხარის მოწვევით ამ ფორმატში ევროპელი პარტნიორებიც ჩაერთნენ“, - დაწერა უმეროვმა პარასკევს Telegram-ზე. მას არ დაუკონკრეტებია რომელ პარტნიორებზეა საუბარი.
მისი თქმით, მხარეები კონსტრუქციულად არიან განწყობილნი.
„ჩვენ უკვე გვქონდა წინასწარი კონსულტაციები ჩვენს ევროპელ კოლეგებთან და ვემზადებით ამერიკულ მხარესთან შემდგომი მოლაპარაკებებისთვის. კონსულტაციების შემდეგ, ანგარიში წარედგინება უკრაინის პრეზიდენტ ვოლოდიმირ ზელენსკის. ჩვენ მკაცრად ვმოქმედებთ პრეზიდენტის მიერ დასახული პრიორიტეტების შესაბამისად: უკრაინის უსაფრთხოება საიმედოდ და გრძელვადიან პერსპექტივაში უნდა იყოს გარანტირებული“, - აღნიშნა უმეროვმა.
მანამდე, აშშ-ში უკრაინის ელჩმა ოლჰა სტეფანიშინამ შეხვედრების გამართვის შესახებ შეთანხმების შესახებ განაცხადა, რომელიც ამ ეტაპზე ორმხრივ ფორმატში გაიმართება.
