13 დეკემბერს, ბელარუსში გათავისუფლებული ცხრა პოლიტიკური პატიმარი ლიეტუვაში გადაიყვანეს, მათ შორის ნობელის პრემიის ლაურეატი ალეს ბიალიაცკი და პოლონეთის ერთი მოქალაქე. ამის შესახებ Reuters იუწყება.
ბელარუსული მედია და ადამიანის უფლებათა დამცველები გათავისუფლებულებს შორის პოლონეთის მოქალაქე რომან გალუზუს ასახელებენ.
ამავდროულად, პოლონელი ჟურნალისტი ანდჟეი პოჩობუტი, რომლის გათავისუფლებასაც ვარშავა დიდი ხანია ცდილობს, გათავისუფლებულთა შორის არ არის.
საგარეო საქმეთა სამინისტროს წარმომადგენელმა მაცეი ვევიორმა აღნიშნა, რომ მან არ იცის, არსებობდა თუ არა ამჯერად მისი გათავისუფლების შანსი.
„რამდენიმე წლის წინ იყო სიტუაცია, როდესაც ანდჟეი პოჩობუტმა მიიღო ასეთი შეთავაზება, მაგრამ არ ისარგებლა ამ შეთავაზებით. ამჯერად არ ვიცი, იყო თუ არა ასეთი შეთავაზება,“ - გაბუცხადა მედიას ვევიორმა.
გათავისუფლებულ პოლონელ მოქალაქესთან დაკავშირებით, წარმომადგენელმა დაადასტურა, რომ ის ვილნიუსში იმყოფება „ცხრა ადამიანს შორის, რომლებიც აშშ-ის საელჩოში მივიდნენ“.
„მოინდომებს თუ არა ის პოლონეთში წასვლას, თუ იქ ცოტა ხნით დარჩება და დაისვენებს, მისი გადასაწყვეტია“, - თქვა მან.
შეგახსენებთ, 13 დეკემბერს ბელარუსში გათავისუფლებული 123 პოლიტპატიმრიდან 114 უკრაინაში გადაიყვანეს, მათ შორის არიან ბელარუსის პრეზიდენტობის ყოფილი კანდიდატი ვიქტორ ბაბარიკო და მისი თანამოაზრე მარია კოლესნიკოვა, პორტალ TUT.by მთავარი რედაქტორი მარინა ზოლოტოვა და მარია ალექსანდროვა.
დღეს, ცნობილი გახდა, რომ ალექსანდრ ლუკაშენკამ დონალდ ტრამპთან მიღწეული შეთანხმებების ფარგლებში უცხო ქვეყნის 123 მოქალაქე შეიწყალა.
გათავისუფლებულ პატიმრებს შორის დიდი ბრიტანეთის, აშშ-ის, ლიეტუვის, უკრაინის, ლატვიის, ავსტრალიისა და იაპონიის მოქალაქეები არიან.
დღეს ასევე ცნობილი გახდა, რომ აშშ-მა ბელარუსის კალიუმის ინდუსტრიაზე დაწესებული სანქციები მოხსნა.
